गाउँको दूरदराजदेखि काठमाडौंको सिंहदरबारसम्म

काभ्रे । काभ्रे, क्षेत्र नं। १ का एमाले उम्मेदवार अमित लामाले स्थानीय उत्पादनमध्ये कफी र जडिबुटीलाई ब्राण्डिङ गर्दै जिल्लालाई आर्थिक समृद्धितर्फ लैजाने योजना पेश गरेका छन् ।

एमाले केन्द्रीय सदस्यसमेत रहेका उनले डाँडापारीका विभिन्न गाउँमा घरदैलोको क्रममा उनले खानीखोला र महाभारत क्षेत्रलाई कफी उत्पादनको पकेट क्षेत्र बनाउने र स्थानीय उत्पादनलाई विश्व बजारमा प्रवर्द्धन गर्ने प्रतिवद्धता जनाए ।

डाँडापारीलाई नेपालकै नमूना जडिबुटी संकलन तथा प्रशोधन केन्द्र बनाउने आफ्नो ‘ड्रिम प्रोजेक्ट’ सार्वजनिक गर्दै परियोजना सफल पार्न जनताको साथ र सहयोग आवश्यक रहेको लामाको भनाइ छ । परियोजना सुरू भएपछि गाउँमै रोजगारका अवसर सिर्जना हुने र युवा विदेश जान नपर्ने सँगै शिक्षा, स्वास्थ्य, खानेपानीलाई पनि प्राथमिकतामा राख्ने उनले बताए ।

घरदैलो कार्यक्रममा समानुपातिक उम्मेदवार इन्द्र तामाङ, पूर्वमन्त्री चन्द्र लामा, बागमती प्रवेश कमिटी सदस्य दिलीप लामा, राकेश लामा, चन्द्र लामा र जिल्ला कमिटी उपाध्यक्ष देवसागर लामा पनि सँगै छन् ।

प्रचार अभियानकै क्रममा महाभारत गाउँपालिका–८ घर्तिछापमा आयोजित कार्यक्रममा ‘घर फर्क अभियान’अन्तर्गत घनश्याम आलेलगायत सहभागी भएका छन् । उनी एमाले विभाजनअघि क्षेत्रीय कमिटीका उपसचिव थिए र पछि एकीकृत समाजवादी पार्टीमा गए । उनीसँगै कोपिला आले, जानकी आले, टंकबहादुर आले, पञ्चलाल जर्घा, गुणमाया अस्तानी, लोकमाया जर्घा, सुकमान घलान, देवराज घिसिङ, विकमान वाइवा, रमेश लामा, समर्पण वाइवा, जितबहादुर सिंतानेश, नेत्रबहादुर दर्लानी, सुरेश थिङ पनि एमालेमा फर्किए।

महाभारत गाउँपालिका(२ धनकाजी मोक्तान, मानबहादुर घिसिङ, धनबहादुर घिसिङ एमाले प्रवेश गरेका छन् । प्रवेशको लहरले आफूलाई हौसला मिलेको लामाले बताए ।