गाउँको दूरदराजदेखि काठमाडौंको सिंहदरबारसम्म

काठमाडौं । भैरहवास्थित मालपोत कार्यालयका तत्कालीन प्रमुख कुमार आचार्यविरुद्ध फेरि अर्को भ्रष्टाचार मुद्दा दायर भएको छ। २० महिनाअघि घुससहित रंगेहात पक्राउ परेका उनी पुनः गम्भीर अनियमिततामा मुछिएपछि सरकारी संयन्त्रको विश्वसनीयतामाथि गम्भीर प्रश्न उठेको छ।

अख्तियार दुरुपयोग अनुसन्धान आयोगका अनुसार मृतक व्यक्तिको नाममा रहेको जग्गा नक्कली हकवाला खडा गरी गैरकानुनी रूपमा नामसारी गरिएको प्रकरणमा आचार्यसहित सात जनाविरुद्ध मुद्दा दायर गरिएको हो। यस प्रकरणमा तत्कालीन मालपोत अधिकृत भूमिवर ढकाल, नायब सुब्बा राजु शर्मा, खरिदार अजितकुमार साहनी, सियारी गाउँपालिका वडा नम्बर २ का तत्कालीन अध्यक्ष रामकिशोर थारु तथा वडा सदस्य बुद्धिराम कहारसमेत प्रतिवादी बनाइएका छन्।

अनुसन्धानअनुसार मृतक बेलर कहारको निधनपछि उनको सम्पत्तिमा वास्तविक हकदार उनकी छोरी सञ्जु कहार थिइन्। तर उनलाई अधिकारबाट वञ्चित गर्ने नियतले स्थानीय व्यक्तिलाई मृतकको भाइ भनेर नक्कली नाता प्रमाणित गराइएको थियो। सोही आधारमा करिब २ बिघा ५ धुर जग्गा फर्जी कागजात तयार गरी अर्कै व्यक्तिको नाममा नामसारी गरिएको खुलासा भएको छ।

यो घटनाले मालपोत कार्यालयभित्रै संगठित रूपमा भ्रष्टाचार हुने गरेको संकेत दिएको छ। सरकारी कर्मचारी र स्थानीय जनप्रतिनिधिबीचको मिलेमतोमा सर्वसाधारणको सम्पत्तिमाथि कब्जा गर्ने प्रवृत्तिले राज्य संयन्त्रप्रति जनविश्वास झनै कमजोर बनाएको छ।

यसअघि आचार्य २४ लाख ५० हजार रुपैयाँ घुससहित पक्राउ परेका थिए। तर सो घटनापछि पनि सुधार नआई पुनः भ्रष्टाचारमा संलग्न हुनु प्रणालीगत कमजोरीको ज्वलन्त उदाहरण बनेको छ।

अख्तियारले उक्त प्रकरणमा संलग्न सबैमाथि कडा कारबाहीको माग गर्दै विशेष अदालतमा मुद्दा दायर गरेको छ। यस्ता घटनाले मालपोत कार्यालयहरूमा भइरहेको अनियमितता नियन्त्रणका लागि कडा निगरानी र संरचनागत सुधार आवश्यक रहेको देखाएको छ।