गाउँको दूरदराजदेखि काठमाडौंको सिंहदरबारसम्म

काठमाडौँ । सरकारले नेपाल रेडक्रस सोसाइटीको नेतृत्व व्यवस्थापनदेखि जलविद्युत् आयोजना, निजामती प्रशासन तथा अध्ययन प्रतिवेदनसँग सम्बन्धित चार महत्वपूर्ण निर्णय गरेको छ।

सरकारका प्रवक्ता तथा शिक्षामन्त्री सस्मित पोखरेलले मन्त्रिपरिषद् बैठकका निर्णय सार्वजनिक गर्दै विशालकुमार भण्डारीको अध्यक्षतामा नेपाल रेडक्रस सोसाइटीको नौ सदस्यीय केन्द्रीय तदर्थ समिति गठन गरिएको जानकारी दिए।

बैठकले तल्लो अरुण, लोवर न्यादी खोला, घुन्सा खोला तथा तादी खोला जलविद्युत् आयोजनाका लागि आवश्यक राष्ट्रिय वन क्षेत्र उपयोग गर्न स्वीकृति प्रदान गरेको छ। यससँगै ती आयोजनाको निर्माण प्रक्रियाले थप गति लिने अपेक्षा गरिएको छ।

त्यस्तै, मन्त्रिपरिषद्ले निजामती सेवा (सोह्रौँ संशोधन) नियमावली, २०८१ लाई स्वीकृत गर्दै प्रशासनिक क्षेत्रको कानुनी व्यवस्थालाई परिमार्जन गरेको छ।

यसबाहेक, पूर्व गृहमन्त्री तथा प्रतिनिधिसभा सदस्य सुदन गुरुङसँग सम्बन्धित अध्ययन तथा छानबिन समितिले बुझाएको प्रतिवेदन पनि मन्त्रिपरिषद्ले ग्रहण गर्ने निर्णय गरेको प्रवक्ता पोखरेलले जानकारी दिए।

सरकारका यी निर्णयलाई प्रशासनिक, ऊर्जा तथा संस्थागत व्यवस्थापनका दृष्टिले महत्वपूर्ण मानिएको छ।