गाउँको दूरदराजदेखि काठमाडौंको सिंहदरबारसम्म

काठमाडौं । विश्वकप उपाधि रक्षा अभियानमा रहेको अर्जेन्टिना सोमबार समूह ‘जे’ को दोस्रो खेलमा अस्ट्रियासँग भिड्दैछ। अमेरिकाको डलासमा नेपाली समयअनुसार राति १०ः४५ बजे हुने खेलमा अर्जेन्टिनाको लक्ष्य लगातार दोस्रो जित निकाल्दै अन्तिम ३२ को यात्रालाई लगभग सुनिश्चित गर्नु हुनेछ।

पहिलो खेलमा अल्जेरियामाथि शानदार जित दिलाएका कप्तान लियोनेल मेसी फेरि एकपटक मुख्य आकर्षणका रूपमा रहनेछन्। ३८ वर्षीय स्टारले ह्याट्रिकसहित अर्जेन्टिनाको आक्रमणलाई नेतृत्व गर्दै विश्वकप इतिहासका सर्वाधिक गोलकर्तामध्ये एक मिरोस्लाभ क्लोजेको १६ गोलको कीर्तिमानसँग बराबरी गरेका छन्।

राष्ट्रिय टोलीबाट आफ्नो २००औँ खेल खेल्ने क्रममा मेसीले फिफा विश्वकपमा पहिलो ह्याट्रिक पूरा गर्दै आलोचकहरूलाई पनि जवाफ दिएका थिए। अल्जेरियाले रातो कार्डको माग गर्दै फिफामा उजुरी गरे पनि अर्जेन्टिनाको ध्यान भने केवल अर्को जितमा केन्द्रित रहेको छ।

अस्ट्रियाका कप्तान डेभिड अलाबाले समेत अर्जेन्टिनाको शक्ति केवल मेसीमा सीमित नरहेको स्वीकार गरेका छन्। विश्व विजेता टोलीसँग जुलियन अल्भारेज, एन्जो फर्नान्डेज, एलेक्सिस म्याक एलिस्टर र लाउटारो मार्टिनेजजस्ता खेलाडी भएकाले अर्जेन्टिना टोलीगत रूपमा पनि अत्यन्त खतरनाक देखिएको छ।

सहायक प्रशिक्षक पाब्लो आइमारले अस्ट्रिया बलियो र उच्च दबाबमा खेल्ने टोली भए पनि अर्जेन्टिना चुनौती सामना गर्न पूर्ण रूपमा तयार रहेको बताएका छन्।

दुवै टोलीको तीन–तीन अंक भए पनि गोलअन्तरका आधारमा अर्जेन्टिना समूहको शीर्ष स्थानमा छ। यस खेलमा जित निकाले अर्जेन्टिनाले नकआउट चरणको ढोका लगभग खोल्नेछ।

पछिल्ला पाँच खेलमा शतप्रतिशत नतिजा निकालेको अर्जेन्टिना उत्कृष्ट लयमा छ। सन् १९८० मा अस्ट्रियामाथि ५–१ को ऐतिहासिक जित निकालेको अर्जेन्टिनाले यसपटक पनि आफ्नो दबदबा कायम राख्ने लक्ष्य लिएको छ।

राइट–ब्याक गोन्जालो मोन्टिएल चोटका कारण बाहिर रहने सम्भावना भए पनि उनको स्थानमा नाहुएल मोलिना मैदानमा उत्रिने अपेक्षा गरिएको छ।

विश्व विजेताको हैसियतमा मैदानमा उत्रने अर्जेन्टिनामाथि सबैको नजर रहनेछ। मेसीको जादु र टोलीको सामूहिक प्रदर्शनले अस्ट्रियामाथि अर्को प्रहार गर्दै नकआउट यात्रा सुरक्षित गर्ने अपेक्षा अर्जेन्टिनी समर्थकहरूले गरेका छन्।