गाउँको दूरदराजदेखि काठमाडौंको सिंहदरबारसम्म

काठमाडौँ । काठमाडौं महानगरपालिकामा पहिलो पटक खोखो प्रतियोगिता हुने भएको छ । काठमाडौं महानगरको सहयोगमा नेपाल खो खो संघले सामुदायिक विद्यालय स्तरीय प्रतियोगिता आयोजना गर्ने भएको हो ।

प्रतियोगिता सम्बन्धी जानकारी दिन आज काठमाडौंमा आयोजित पत्रकार भेटघाट कार्यक्रममा, पहिलो पटक महानगरपालिका व्यापी विद्यालय स्तरीय प्रथम उपमेयर कप खोखो प्रतियोगिता २०८३ हुन गइरहेको जानकारी दिइएको हो ।

काठमाडौं महानगरका शिक्षा अधिकृत केशव ज्ञवालीले शिक्षा र खेलकुदका कार्यक्रमलाई समानान्तर र समान प्राथमिकताका साथ सञ्चालन गर्ने योजना अनुरूप यो प्रतियोगिता गर्न लागिएको बताए । ज्ञवालीका अनुसार ३६ लाख रुपियाँ लागत रहेको प्रतियोगिताका लागि काठमाडौं महानगरपालिकाले ३० लाख रुपियाँ प्रदान गर्नेछ । संघले ६ लाख रुपियाँ लागत व्यहोर्नेछ ।

संघका अध्यक्ष दिपक महर्जनले विद्यालय स्तरमा खो खो खेलको विकासमा यो प्रतियोगिताले अवसर प्रदान गर्ने धारणा राखे । उनका अनुसार प्रतियोगितामा सामुदायिक विद्यालय तह कक्षा १० सम्म अध्ययनरत छात्रछात्रा दुवै समूहका खेलाडीहरूले भाग लिनेछन् । खेल लिग कम नक आउटका आधारमा खेलाइनेछ । प्रतियोगिताको निर्णयका लागि ३० जना निर्णायक मण्डल रहनेछन् ।

प्रतियोगितामा शान्ति निकुञ्ज मा.वि., महांकाल मा.वि., भीमसेनगोला मा.वि., पद्मकन्या मा.वि., जनप्रभात मा.वि., सहिद शुक्र मा.वि., विश्व निकेतन मा. वि., सर्वेश्वर आधारभूत विद्यालय, बाँसबारी मा.वि. र कन्या मन्दिर माध्यमिक विद्यालयले भाग लिएका छन् । यस खेलको एउटा टीममा १२ जना खेलाडी रहनेछन् ।

संघका महासचिव शंकर महर्जनले १२ औँ र १३ औँ दक्षिण एशियाली खो खो प्रतियोगितामा लगातार कास्य र रजत पदक दिलाउँदै आएको खेल नेपाली खेलाडी बिच लोकप्रिय हुँदै गएको बताए ।

प्रतियोगिता कीर्तिपुर खोखो हलमा असार १० गतेदेखि १३ गतेसम्म सञ्चालन हुनेछ । १० वटा सामुदायिक विद्यालयका टोलीले भाग लिएको यो प्रतियोगितामा महिलातर्फ १० वटा र पुरुषतर्फ ८ वटा समूहले प्रतिस्पर्धा गर्दै छन् ।

खेलमा १८ टिमका २१६ खेलाडी तथा ३६ प्रशिक्षक र टिम व्यवस्थापक गरी २५२ जनाको प्रत्यक्ष सहभागिता रहनेछ ।