गाउँको दूरदराजदेखि काठमाडौंको सिंहदरबारसम्म

काठमाडौं । कर्मचारीको सरुवा तथा पदस्थापनसम्बन्धी विवरण व्यवस्थापन गर्न प्रयोग हुँदै आएको किताबखानाको एप सञ्चालनमा नआउँदा सरुवा प्रक्रियामा समस्या देखिएको छ।

कर्मचारीको सेवा अवधि, पद, दरबन्दी, सरुवा भएको मिति तथा सम्बन्धित विवरण हेर्नुपर्ने अवस्थामा एपमा समस्या आएपछि आवश्यक विवरण तत्काल प्राप्त गर्न नसकिएको बताइन्छ । यसले सरुवा निर्णय कार्यान्वयन तथा सम्बन्धित कार्यालयमा कर्मचारीलाई रमाना दिने प्रक्रियासमेत प्रभावित भएको बताइएको छ।

विशेषगरी सरुवा भएका कर्मचारीको विगतको पदस्थापन र सेवा अवधिसम्बन्धी विवरण यकिन गर्नुपर्ने अवस्थामा प्रणालीले काम नगर्दा प्रशासनिक काममा थप झन्झट उत्पन्न भएको छ। विवरण अद्यावधिक गर्न तथा सरुवासम्बन्धी प्रक्रिया अघि बढाउन सम्बन्धित कर्मचारी र कार्यालयले वैकल्पिक माध्यमको सहारा लिनुपर्ने अवस्था आएको छ।

कर्मचारी सरुवा नियमित प्रशासनिक प्रक्रिया भए पनि त्यसको अभिलेख व्यवस्थापन प्रणालीमै समस्या देखिएपछि सरुवा आदेश कार्यान्वयनमा समेत ढिलाइ हुन सक्ने अवस्था बनेको छ। यसले एकातर्फ कर्मचारीलाई अन्योलमा पारेको छ भने अर्कोतर्फ कार्यालयमा जनशक्ति व्यवस्थापन प्रभावित हुने जोखिम बढाएको छ।

सरुवा भएका कर्मचारीले तोकिएको कार्यालयमा पुगेर जिम्मेवारी सम्हाल्न किताबखानासहित सम्बन्धित प्रशासनिक निकायबाट आवश्यक विवरण तथा प्रक्रिया पूरा गर्नुपर्ने हुन्छ। तर प्रणालीमा आएको प्राविधिक समस्याका कारण सामान्य प्रशासनिक कामसमेत रोकिँदा कर्मचारीले अनावश्यक हैरानी बेहोर्नुपरेको गुनासो गरेका छन्।