गाउँको दूरदराजदेखि काठमाडौंको सिंहदरबारसम्म

काठमाडौं। प्रधानमन्त्रीको सरकारी निवास बालुवाटारमा जारी सत्तारुढ गठबन्धनको बैठक बिना निष्कर्ष सकिएको छ। मन्त्रिपरिषदलाई पूर्णता दिने भनिए पनि दलबीच सहमति जुट्न नसकेपछि बिनानिष्कर्ष बैठक सकिएको हो ।

बैठकमा केही दिनदेखि सरकार विस्तार र मन्त्रालय बाँडफाँटबारे छलफल भएको हो, तर मन्त्रालयमा भागवण्डा नमिल्दा बैठक बिनानिष्कर्ष सकिएको जनाइएको छ ।

हाल कांग्रेसलाई ७, माओवादी केन्द्रलाई ६, एकीकृत समाजवादी र जनता समाजवादी पार्टीलाई ४ र ४ वटा मन्त्रालयको सहमति जुटाउने प्रयास भइरहेको छ। जसपाले पनि मन्त्रालय बाँडफाँट समान हुनुपर्ने अडान राखिरहेको छ।

५ दलको समर्थनमा बनेको वर्तमान देउवा सरकारमा राष्ट्रिय जनमोर्चाबाहेक अन्य ४ दलको सहभागिता हुनेछ । हाल आफूसहित प्रधानमन्त्री देउवाले कांग्रेस र माओवादीलाई सरकारमा सहभागी गराएका छन् । सरकार गठन भएको डेढ महिना बितिसक्दा पनि अहिलेसम्म देउवाले मन्त्रिपरिषद् विस्तार गर्न सकेका छैनन् ।

छलफलमा प्रधानमन्त्री शेरबहादुर देउवा, माओवादी अध्यक्ष प्रचण्ड, प्रचण्ड, एकीकृत समाजवादीका अध्यक्ष माधवकुमार नेपाल, जनता समाजवादी पार्टी (जसपा) अध्यक्ष उपेन्द्र यादवलगायतको सहभागिता रहेको थियो।

गठबन्धनमा आवद्ध दलबीच आज मन्त्रालयको भागबण्डा टुंग्याउने र भोलिसम्ममा मन्त्रिपरिषद् विस्तार गर्ने तयारी छ। बैठक आज साँझका लागि पुन: डाकिएको छ ।