सामाजिक विषयको पढाइ नेपाली र अंग्रेजी दुवै भाषामा

Ghorahi cement

काठमाडौं । पाठ्यक्रम तथा मूल्यांकन परिषदले विद्यालय तहको सामाजिक अध्ययन विषय नेपाली र अंग्रेजी दुवै माध्यमबाट पठनपाठन गर्न पाइने निर्णय गरेको छ।

 

परिषद्का अध्यक्ष एवं शिक्षा, विज्ञान तथा प्रविधिमन्त्री अशोक राईको अध्यक्षतामा बुधबार बसेको बैठकले नेपाली सम्बन्धनमा विदेशमा खुलेका नेपाली पाठ्यक्रममा आधारित पठनपाठन गराइने विद्यालयहरूले सामाजिक अध्ययन अंग्रेजी भाषा माध्यमबाट पठनपाठन गर्नगराउन पाइने निर्णय गरेको हो। साथै नेपालमा खुलेका विदेशी कूटनीतिक नियोगका विदेशी विद्यार्थी अध्ययन गर्ने विद्यालयहरूमा समेत अंग्रेजी माध्यमबाट सामाजिक विषय शिक्षण सिकाइ गर्न गराउने निर्णय गरेको गरिएको परिषद्का अध्यक्ष शिक्षामन्त्री राईले बताए।

 

उनले हाल विद्यालयहरूमा सामाजिक अध्ययन विषय नेपाली माध्यमबाट पठनपाठन गराउँदा विदेशी विद्यार्थीहरूलाई बुझ्न अप्ठयारो भएको भनी आएको गुनासोका आधारमा परिषद्ले विद्यालय तहमा सामाजिक अध्ययन विषयलाई नेपाली र अंग्रेजी दुवै भाषा माध्यमबाट पठनपाठन गराउने निर्णय गरेको जनाए।

 

यो निर्णय आगामी वर्ष एसइई दिने सवालमा पठनपाठन मिलाउने गरी भएको हो। ‘विदेशमा बसेका नेपालीका बच्चाबच्चीको नेपाली भाषा आधार र नेपालमै बसेका विदेशी बच्चाबच्चीको नेपाली भाषाको आधार कमजोर रहेको पाइएको गुनासाहरू आए,’ मन्त्री राईले भने, ‘बुधबारको बैठकले भने यी दुवै किसिमको विद्यालय र विद्यार्थीको हकमा अंग्रेजी र नेपाली दुवै भाषा माध्यमबाट पठनपाठन गराउने निर्णय गरेको हो।’

 

मन्त्री राईले निर्णयबारे बताउँदै भने, ‘अहिले विद्यालय तहमा सामाजिक विषय अनिवार्य रूपमा नेपाली भाषा माध्यमबाट अध्ययन गराउँदा समस्या आएको विद्यालयहरूको गुनासो आयो। अब सबै विद्यालयको सवालमा कस्तो निर्णय गर्ने बारे थप अध्ययन गरि मात्र अर्को निर्णय हुन्छ। अहिलेलाई अन्य विद्यालयहरूमा भने नेपाली भाषा माध्यमबाटै समाजिक विषयको पठनपाठन हुने निर्णय हो।’

 

दुई वर्षअघि मात्र नेपाली भाषा र राष्ट्रियता प्रवर्धन गर्न भनेर विज्ञहरूसँग बृहत् छलफलपछि विद्यालय तहको समाजिक अध्ययन विषयलाई नेपाली भाषामा पढाउन थालिएको हो। अर्कातर्फ निजी विद्यालयहरूले भने सामाजिक विषयलाई पनि अंग्रेजी भाषा माध्यमबाट पढाउन पाउनुपर्ने निर्णय गराउन दबाब दिँदै आएको स्रोतले बतायो।

 

यति मात्र होइन, यही निर्णयमा टेकेर निजी विद्यालय सञ्चालकहरू सामाजिक अध्ययन अंग्रेजी भाषा माध्यमबाटै पढाउने तरखरमा रहेको स्रोत बताउँछ। यही आधारमा अब राष्ट्रिय परीक्षा बोर्डले अगामी वैशाख २६ गते सुरु हुने कक्षा १२ को प्रश्नपत्र तयारीमा जुटेको बोर्डका अध्यक्ष महाश्रम शर्माले बताए। नागरिक दैनिकबाट

Shangri-la Development Bank Ltd.
Nepali patro