गाउँको दूरदराजदेखि काठमाडौंको सिंहदरबारसम्म

बाजुरा । बाजुरा–हुम्ला सीमा क्षेत्र अन्तर्गत हिमाली गाउँपालिका–३ लाम्पाटामा उत्पन्न भएको विवादको विषयमा जिल्ला प्रशासन कार्यालय बाजुरामा बसेको सर्वदलीय बैठकले पाँच बुँदे निर्णय गरेको छ ।

बैठकले लाम्पाटामा अस्थायी प्रहरी चौकी निर्माणको विषयलाई लिएर हुम्लाका केही बासिन्दाबाट बाजुराका स्थानीय तथा पर्यटक माथि कुटपिट र लुटपाट भएको घटनाप्रति गम्भीर ध्यानाकर्षण भएको जनाएको छ ।

सर्वदलिय बैठकले घटनाको निष्पक्ष छानबिन गर्न उच्चस्तरीय छानबिन समिति गठन गरी दोषी माथि कानुनी कारबाहीका लागि गृह मन्त्रालयमा सिफारिस गर्ने निर्णय गरेको छ । आन्तरिक तथा वाह्य पर्यटकलाई सुरक्षाको प्रत्याभूति दिलाउन सो क्षेत्रमा सुरक्षा निकायको उपस्थिति गराउन सम्बन्धित निकायसँग अनुरोध गर्ने निर्णय समेत गरिएको छ ।

कर्णाली करिडोर अन्तर्गत हिमाली गाउँपालिका क्षेत्रमा सवारी साधन सञ्चालनमा अवरोध नगरी निर्वाध आवागमनको वातावरण बनाउन सबै पक्षसँग संवाद र समन्वय गर्ने निर्णय गरिएको प्रमुख जिल्ला अधिकारी डोरेन्द्र निरौलाले बताए।

बाजुरा र हुम्ला जिल्लाबीचको आपसी सद्भाव कायम राख्दै घटनामा संलग्न जो–कोहीलाई कानुनी दायरामा ल्याई आवश्यक सहयोग र समन्वय गर्न दुवै जिल्लाका सरोकारवालासँग अपिल गर्ने निर्णय गरिएको जानकारी दिए।

हिमाली गाउँपालिका –३ लाम्पाटामा झडप हुँदा हिमाली गाउँपालिका ३ लाम्पाटा बस्ने पेमा गारा गुरुङ, लक्ष्मी गुरुङ, मिन कुवर र नरबहादुर गुरुङ प्रहरी चौकी बिच्छ्यामा कार्यरत प्रहरी सहायक हवल्दार महेश धामी र हिमाली गाउँपालिकाका प्रमुख प्रशासकीय अधिकृत कुल बहादुर थापा घाइते भएका थिए ।

घाइते मध्ये ४ जनालाई थप उपचारको लागी हेलिकप्टर मार्फत उद्धार गरिएको थियो। अस्थायी प्रहरी चौकी निर्माण र सिमा विवादमा दुई जिल्लाका स्थानीयबिच झडप भएको थियो।

‘हाम्रो सुदुरपश्चिम हामी चिनाउँछौ’ अभियानमा मेयर गोपाल हमाल लगायतको टिमलाई रानिसैन जानबाट रोक लगाईएको थियो।

विगत लामो समय बाजुरा जिल्ला हिमाली गाउँपालिका –३ लाम्पाटा र चियाचौर ठाउँ बाजुराको सिमाना भित्र पर्ने क्षेत्रलाई हुम्ली बासीहरुले आफ्नो जिल्लामा पर्छ भनेर दाबी गर्दै आएका छन । त्यस्तै नेपाल पत्रकार महासंघ बाजुराले समेत घटनाको घोर निन्दा र भत्र्सना गर्दै प्रेस विज्ञप्ती जारी गरेको छ ।

नेपाल पत्रकार महासंघ जिल्ला शाखा बाजुराका कोषाध्यक्ष उमेश बहादुर शाहीको ड्रोन क्यामरा र मोबाईल समेत जफत गरी तोडफोड गरेको र सोही विषयलाई लिएर नेपाल पत्रकार महासंघ जिल्ला शाखा बाजुराका पूर्व अध्यक्ष प्रकाश बहादुर सिंहलाई सामाजिक संजालमा गाली बेईजती गरेको कुरा प्रति महासंघ बाजुराले खेद प्रकट गरेको छ।