गाउँको दूरदराजदेखि काठमाडौंको सिंहदरबारसम्म

काठमाडौं । सर्वोच्च अदालतले पक्राउ परेका पत्रकार किशोर श्रेष्ठलाई रिहा गर्न आदेश दिएको छ। सर्वोच्चको आदेशसँगै श्रेष्ठलाई हिरासतमा राखेर अनुसन्धान गर्ने प्रहरीको कदममाथि गम्भीर प्रश्न उठेको छ।

न्यायाधीशद्वय नहकुल सुवेदी र बाबुराम ढकालको इजलासले श्रेष्ठलाई हिरासतमा नराखी बाहिरै राखेर अनुसन्धान गर्न आदेश दिएको हो।

श्रेष्ठलाई गैरकानुनी रूपमा पक्राउ गरिएको दाबी गर्दै उनकी पत्नीले सर्वोच्च अदालतमा बन्दी प्रत्यक्षीकरणको रिट दायर गरेकी थिइन्। उक्त रिटमाथि सुनुवाइ गर्दै सर्वोच्चले श्रेष्ठलाई तत्काल हिरासतबाट मुक्त गर्न आदेश दिएको हो।

पत्रकार श्रेष्ठलाई पक्राउ गरी हिरासतमा राखिएको विषयले पछिल्लो समय प्रेस स्वतन्त्रता, पत्रकारको सुरक्षा तथा राज्यका निकायले कानुनको प्रयोग गर्ने तरिका माथि बहस चर्किएको थियो। पत्रकारलाई अनुसन्धानका नाममा अनावश्यक रूपमा थुन्ने प्रवृत्तिमाथि पनि प्रश्न उठ्दै आएको थियो।

सर्वोच्चको आदेशसँगै श्रेष्ठले अब हिरासतबाहिर रहेर अनुसन्धान प्रक्रियामा सहभागी हुनुपर्नेछ। अदालतको यो आदेशले व्यक्तिको स्वतन्त्रता र कानुनी प्रक्रियाको पालना सम्बन्धमा राज्यका निकायलाई स्पष्ट सन्देश दिएको छ।

पत्रकार पक्राउ प्रकरणमा सर्वोच्चको हस्तक्षेपसँगै प्रेस स्वतन्त्रताको पक्षमा बहस थप चर्किएको छ।