गाउँको दूरदराजदेखि काठमाडौंको सिंहदरबारसम्म

काठमाडौं । भोटेकोशी र त्रिशूली नदीमा आएको बाढीका कारण रसुवासहित नुवाकोट, धादिङ, गोरखा, चितवन, तनहुँ र पूर्वी नवलपरासीका तटीय क्षेत्रमा प्रभावित भएपछि नेपाल प्रहरीले उद्धार तथा खोजी कार्यलाई तीव्रता दिएको छ ।

नेपाल प्रहरीका केन्द्रीय प्रहरी प्रवक्ता अबि नारायण काफ्लेले आज सामाजिक सञ्जालमार्फत भिडियो सन्देश जारी गर्दै विपद्पछि प्रभावित क्षेत्रमा प्रहरी जनशक्ति व्यापक रूपमा परिचालन गरिएको जानकारी दिए ।

उनले भने, ‘भोटेकोशी र त्रिशूली नदीमा आएको बाढीका कारण रसुवाको तटीय क्षेत्र हुँदै नुवाकोट, धादिङ, गोर्खा, चितवन, तनहुँ र पूर्वी नवलपरासी समेत प्रभावमा परेको अवस्थामा नेपाल प्रहरीले तत्काल उद्धार तथा खोजी कार्यलाई प्राथमिकतामा राखेर जनशक्ति परिचालन गरेको छ ।’

उनले रसुवाका विभिन्न प्रहरी कार्यालयमा कार्यरत ६४ प्रहरीमध्ये ३२ जना प्रहरी सम्पर्कमा आएका छन् भने २८ जना अझै सम्पर्कविहीन रहेको बताए । बाढी तथा विपद्का कारण विभिन्न जिल्लामा हालसम्म १०० वटा शव फेला परेको प्रवक्ता काफ्लेले जानकारी दिएका छन् ।

उनले भने, ‘रसुवाका विभिन्न प्रहरी कार्यालयमा कार्यरत ६४ जना प्रहरीमध्ये ३२ जना प्रहरी सम्पर्कमा आएका छन् भने २८ जना प्रहरी हालसम्म सम्पर्कविहीन रहेका छन् । यसैगरी हालसम्म विभिन्न जिल्लाहरूमा १०० वटा शव फेला परेको छ । यस प्राकृतिक विपद्लाई मध्यनजर गर्दै नेपाल प्रहरीबाट केन्द्र अर्थात् प्रहरी प्रधान कार्यालयबाट र स्थानीय प्रहरीहरू समेत परिचालन भएको अवस्थाहरू छ ।’

उनले उद्धार तथा खोजी कार्यलाई थप प्रभावकारी बनाउन प्रहरी प्रधान कार्यालयबाट प्रहरी वरिष्ठ उपरीक्षक चन्दबहादुर बुढाथोकीको कमान्डमा थप मेडिकल टोलीसहित २२ जना प्रहरी रसुवातर्फ पठाइएको बताए । खोज तथा उद्धारका लागि चारवटा ड्रोनसमेत परिचालन गरिएको उनले उल्लेख गरे ।

उनकाअनुसार प्रभावित विभिन्न जिल्लामा स्थानीय प्रहरीतर्फबाट मात्रै ३ हजार ३१८ जना जनशक्ति परिचालन गरिएको छ । प्रहरीले उद्धार, खोजी तथा राहत कार्यलाई प्राथमिकतामा राखेर आवश्यक समन्वय र जनशक्ति व्यवस्थापन गरिरहेको जनाएको छ ।

यसैगरी शव व्यवस्थापन, मुचुल्का लेखन, कानुनी सहायता तथा समन्वयका लागि प्रहरी नायव महानिरीक्षक सुदर्शनप्रसाद कोइरालालाई आपत्कालीन समन्वय केन्द्रमा खटाइएको उनले बताए । प्रहरी वरिष्ठ उपरीक्षक दीपशमशेर जबराको कमान्डमा ‘रिलिफ एन्ड रेस्क्यु’ टोलीसमेत रसुवातर्फ परिचालन गरिएको बताए ।

नेपाल प्रहरीले बाढी तथा विपद् प्रभावित जिल्लामा उद्धार, खोज तथा राहत कार्यलाई थप व्यवस्थित बनाउन वरिष्ठ प्रहरी अधिकृतहरूलाई फोकल पर्सनका रूपमा समेत परिचालन गरेको उनले बताए ।