बलेफीमा कृषि उपकरण खरिदमा कमिसनको खेल

10.9K
shares
Nabil bank

सिन्धुपाल्चोक ।बलेफी गाउँपालिका–६ नम्बर वडा कार्यालयमार्फत विनियोजित कृषि कार्यक्रमको बजेटमा कमिसनको खेल भएको आरोप लागेको छ। कृषि उपकरण खरिदका लागि छुट्याइएको बजेटबाट सहकारीलाई रकम उपलब्ध गराउने क्रममा कर्मचारीले कमिसन मागेको भन्दै गाउँपालिकामा उजुरी परेको छ।

बलेफी–६ का लागि आर्थिक वर्ष २०८२/८३ मा केराको थामबाट रेशा निकाल्ने प्रविधि प्रवर्द्धन गरी किसानको आयआर्जन बढाउने उद्देश्यले बजेट विनियोजन गरिएको थियो। सहकारी साझेदारी कार्यक्रमअन्तर्गत विनियोजित रकमबाट मेसिन खरिद गर्ने योजना थियो।

उजुरीमा उल्लेख भएअनुसार श्री सदाबहार साना किसान कृषि सहकारी संस्था लिमिटेड, बलेफी–६ सँग साझेदारी कार्यक्रमका लागि सम्झौता गरी गाउँपालिकाको खातामा सहकारीको ५० प्रतिशत लागत सहभागिताबापत ६५ हजार ५ सय रुपैयाँ जम्मा गर्न भनिएको थियो। सहकारीले उक्त रकम गाउँपालिकाको खातामा जम्मा गरेपछि बैंक भौचर गाउँपालिकामा पेस गरेको पत्रमा उल्लेख छ।

तर, गाउँपालिकामा कार्यरत कृषि प्राविधिक चौथो तहका कर्मचारी सन्देश हमालले मेसिन खरिदमा कमिसन मागेको आरोप पत्रमा लगाइएको छ। कमिसन नपाएपछि बजेट फ्रिज गराउने अवस्था सिर्जना गरिएको र त्यसका कारण सहकारीका सदस्यहरू केराको फाइबर उत्पादन तथा बिक्री–वितरण कार्यक्रमबाट वञ्चित भएको दाबी गरिएको छ।

उजुरीमा सम्बन्धित कर्मचारीमाथि छानबिन गरी कारबाही गर्न तथा निजबाट सोधभर्ना गराई सहकारीलाई तत्काल मेसिन खरिदका लागि रकम उपलब्ध गराउन माग गरिएको छ। साथै, कर्मचारीलाई उक्त कार्यालयबाट अन्यत्र स्थानान्तरण गर्ने व्यवस्था मिलाउनसमेत अनुरोध गरिएको छ।

उजुरीमा प्रमुख प्रशासकीय अधिकृतलाई निज व्यक्तिमाथि आवश्यक कारबाही गरी रकम असुलउपर गर्न र वडा अध्यक्षलाई सम्बन्धित निकायमा पहल गरी आवश्यक कारबाहीका लागि प्रक्रिया अघि बढाउन अनुरोध गरिएको छ।

civil hospital
Hams Hospitals
Subscribe
Notify of
guest

0 Comments
Oldest
Newest Most Voted
0
Would love your thoughts, please comment.x
()
x