गाउँको दूरदराजदेखि काठमाडौंको सिंहदरबारसम्म

काठमाडौं । जिल्ला अदालत काठमाडौंले धितोपत्र तथा बिमासम्बन्धी कसुरमा अभियोग लागेका दीपक भट्ट र सुलभ अग्रवाललाई धरौटीमा रिहा गर्न आदेश दिएको छ।

जिल्ला अदालतका न्यायाधीश शिवप्रसाद आचार्यको इजलासले बिहीबार जारी गरेको थुनछेक आदेशअनुसार बिमासम्बन्धी कसुरतर्फ दीपक भट्टसँग २ करोड रुपैयाँ र सुलभ अग्रवालसँग १ करोड ५० लाख रुपैयाँ धरौटी माग गरिएको छ।

यस्तै, धितोपत्रसम्बन्धी कसुरमा सुलभ अग्रवालसँग १ करोड ५० लाख रुपैयाँ तथा दीपक भट्टसँग १ करोड रुपैयाँ धरौटी माग गर्ने आदेश अदालतले दिएको छ।

जिल्ला अदालत काठमाडौंमा एक सातासम्म निरन्तर भएको बहस र सुनुवाइपछि बिहीबार थुनछेक आदेश जारी भएको हो। अदालतले अभियुक्तहरूलाई तोकिएको धरौटी बुझाएमा रिहा हुने र धरौटी बुझाउन नसके कानुनबमोजिम थुनामा रहने व्यवस्था गरेको छ।

यसैबीच, धितोपत्रसम्बन्धी अर्को छुट्टै मुद्दामा पनि अदालतले सुलभ अग्रवालसँग २ करोड ३० लाख रुपैयाँ धरौटी माग गरेको छ। यससँगै अग्रवालले विभिन्न मुद्दामा करोडौँ रुपैयाँ बराबरको धरौटी बुझाउनुपर्ने अवस्था सिर्जना भएको छ।

उक्त मुद्दाको थप सुनुवाइ तथा अन्तिम फैसला भने अदालतमा हुने नियमित न्यायिक प्रक्रियाअनुसार अघि बढ्नेछ। अदालतको थुनछेक आदेशले अभियुक्त दोषी वा निर्दोष भएको अन्तिम निष्कर्ष भने जनाउँदैन; मुद्दाको अन्तिम फैसला पछि मात्र दोष–निर्दोषको टुंगो लाग्नेछ।