गाउँको दुरदराजदेखि काठमाडौंको सिंहदरबारसम्म

नयाँ वर्षसँगै घरको भित्ता र कार्यालयको टेवलमा पात्रोमात्र फेरिँदैन, यसले आफूसँगै नयाँ–नयाँ आशा, विश्वास, भरोसा  र सम्भावनासमेत लिएर आएको हुन्छ । नेपालको विक्रम सम्वत वा नयाँ वर्ष समग्र नेपालीहरुको साझा नयाँ वर्ष भएकोले यस्को विशेष महत्व रहेको छ र यसलाई सबैले हर्षोल्लासका साथ मनाउनु पर्छ । आजकल पश्चिमा संस्कृतिको बढ्दो प्रभावका कारण नेपाली नयाँ वर्ष भन्दा अंग्रेजी नयाँ वर्ष मनाउनेको भीड बाक्लीदो छ । अंग्रेजी नयाँ वर्ष पनि मनाउन सकिन्छ, शुभकामना आदन प्रदान गर्न सकिन्छ तर त्यो भन्दा बढि नेपाली वर्षमा आफ्नो आत्मा गाँसीएको हुनु पर्छ, यसलाई हराउन दिनु हुँदैन । तसर्थ नयाँ वर्षको अवसरमा स्वदेश तथा विदेशमा रहनु हुने सम्पूर्ण नेपालीजन र नेपालीमनहरुमा सुख शान्ती , सम्वृद्धि तथा खुशीको लागि हार्दिक शुभकामना ।

नेपालमा मनाईने विविध चाड, पर्व, उत्सव र दिन आदिलाई तेरो मेरो नभनी अनेकतामा एकताको भाव राखी, सामाजिक सद्भाव र उच्च अनुशासन कायम राखी मनाउनु पर्छ । आफुले आफ्नो संस्कृतिको सम्मान गर्दा अरुको संस्कृतिमा ठेस पुग्छ कि भनेर विचार गर्नु पर्छ । सबै नेपालीहरुको साझा दिन नयाँ वर्ष वैशाख १ गतेलाई नयाँ उत्साह, उमंगका साथ आपसी भातृत्वभाव कायम गर्दै मनाउनु पर्छ । अघिल्लो वर्ष आफुबाट जान अन्जानमा कुनै गल्ती, कमजोरी भएको भए पनि त्यसबाट पाठ सिकेर अव त्यस्ता गल्ती तथा असावधानी नगर्ने प्रतिवद्धता व्यक्त गर्नु पर्छ । आफुमा कुनै कुलत वा दुव्र्यसन छ भने पनि नयाँ वर्ष देखि छोडेर समाजमा असल नागरिकको रुपमा जिउने मानसिक प्रतिवद्धता जनाउनु पर्छ । घर परिवारमा मेल मिलाप नभएको भए पनि नयाँ वर्षको पुर्व सन्ध्यामा बसेर छलफल गरि तिक्तता त्याग्नु पर्छ र मेलमिलापको वातावरण तयार गर्नु पर्छ । समाजमा कोहि कसै उपर बैमनष्यता भए पनि सोहि दिन देखि त्यागेर असल कर्मको सुरुआत गर्न सकिन्छ तसर्थ नयाँ वर्ष भनेको हिजोका दिनबाट पाठ सिक्दै बाँकी जीवन नयाँ जोश, जाँगर र उमंगका साथ खुशीले जीउने प्रण गर्ने र सोहि बमोजिमको व्यवहार गर्ने दिन भएकोले यो नयाँ वर्षले हामी सबैमा सद्वुद्धि ल्याओस्, हाम्रो परिवार साच्चै परिवार बनोस्, हाम्रो समाज मानविय समाज बनोस् देशमा कानूनको शासन चलोस् र विकास र समृद्धिको दिशामा अगाडि बढोस्, शुभकामना ।

२०८१ ले हामी सवैलाई विदा गरेर गएको छ । वर्षको सबैमा शुभकामना । प्रकृतिमा बषन्त ऋतु सँगै पुराना पात झरेर नयाँ पालुवा पलाएका छन । जताततै रंगीबिरंगी फूलपातले प्रकृति  बेहुली झै सिँगारिएको छ । कोइलीको कुहुकुहुले रनवन ढाकेको छ । बनपाखामा चराचुरुंगीले नयाँ नयाँ गुँड बनाएका छन ।  यही मनमोहक वसन्त ऋतुको आनन्द, उल्लास र उमंगसँगै हामी नयाँ वर्षको आगमनलाई स्वागत गरिरहेका छौं ।

नयाँ बर्षको शुरुवातसँगै मनमा निरन्तर शुद्ध, शुभ र सकारात्मक चिन्तनहरू उत्पन्न भइरहोस् । शुभ, शुद्ध र सकारात्मक चिन्तनले समाजमा विश्व वन्धुत्व र भाईचारा बढोस्  । नयाँ बर्षको विहानी सँगै अध्यात्मिक चिन्तनले मानिसलाई सबै प्रति निरन्तर शुभ सोच, परोपकारी भावना, सर्व हित र सुखद जीवनको कामना गर्ने एक महान् व्यक्तित्व निर्माण गर्नमा मद्दत गरोस् । मानिसमा अध्यात्मिक चेतना र जागृति पलाओस् जसबाट परिचालित व्यक्तिले कुनै पनि अवस्था र परिस्थितिमा नकारात्मक सोच र कुभलोका भावना पैदा गर्ने अवस्था सिर्जना नवनोस्  । नयाँ बर्षले सबेको भलाइ, शुभभाव, दयाभाव तथा क्षमाभाव राखी उसको हर प्रकारको सुख, समृद्धि र कल्याण गरोस् । अध्यात्मिक जागृति र चिन्तनको विजारोपणबाट महानताको शिखर चुम्न सबै सफल बनुन् ।

नयाँ बर्षको शुरुवातसँगै संसार चिरकालसम्म सुख, शान्ति, समृद्धि र सुमधुर सम्बन्धको थलो बनोस् । धरती निवासी सम्पूर्ण मानवजाति कुनै पनि प्रकारको रोग, शोक, भोक, चिन्ता र भय–त्रासले पीडित नहोउन् । सबैले स्वास्थ्य, सम्पत्ति र खुशी सदाका लागि प्राप्त गर्न सकून् । समाजमा कुनै पनि प्रकारको भेदभाव, थिचोमिचो ,अन्याय,अत्याचार तथा पापाचारको स्थिति नरहोस् । हत्या, हिंसा, लडाईं, झगडा, युद्ध, संघर्षको वातावरण सदाका लागि समाप्त होस्। सबै प्राणीको जीवनचक्र सही ढंगले चलोस् । विविध प्रजाति लुप्त हुने स्थिति, वातावरणीय प्रदूषण तथा असन्तुलनको संकट नरहोस् । प्रकृतिका तत्वहरू समेत आफ्नोे मर्यादामा रहेर सधै सुख दिने काम गरुन् । कुनै पनि प्रकारको प्राकृतिक प्रकोपको चपेटामा पर्न न परोस् । प्रकृति सदा वसन्तवहार होस् ।संसार स्वर्ग, पाराडाइज तथा रामराज्य बनोस् । मानिस मानिसकाबीच अत्यन्तै घनिष्ठ र सुमधुर सम्बन्ध कायम होस् । वसुधा भौतिक प्रचुरता, विपुलताका साथै अध्यात्मिक दिव्यता र अखण्डताले भरपूर होस् । अध्यात्मिक चिन्तन–ज्ञान र राजयोग साधनाले जीवनलाई महानताको शिखरसम्म पुरयाओस् ।मानव जीवनलाई अनुशासित, मर्यादित र सन्तुलित बनाउन सकोस् । यसले मानव जीवनलाई सुख भन्दा आनन्दतर्फ लैजान सकोस् ।  जननीरुपी धर्ति मातालाई जोगाउन सकोस् । मानव सभ्यतामा अनुशासित, मर्यादित र सन्तुलित जीवनका लागि अध्यात्म ज्ञानको सिञ्चन छरोस् ।

नयाँ बर्षसँगै अध्यात्मिक ज्ञानले निरन्तर मानव स्वभाव, संस्कार, बानी, व्यहोरा र उसको प्रवृत्ति तथा मन–बुद्धिलाई सुुसंस्कृत कुशल र विवेक सङ्त वनोस् । मानिसलाई स्व–अनुशासित, स्व–संयमित, शान्त, सहनशील, गुणवान्, चरित्रवान् र नैतिकवान् व्यक्तित्व प्रदान गर्न नयाँ बर्ष सफल वनोस् । नयाँ बर्ष २०८२ को शुरुवातसँगै मानिसलार्ई एक असल मानिस बनाउन सकोस् । सबैलाई मनसा, वाचा, कर्मणा र व्यवहारले सुख र खुशी बाँड्न सकोस्  । व्यक्तिमा शान्तिकामी चिन्तन, मानसपटलको आचारसंहिता र कालजयी चिजको खोजी गर्न सकोस् ।