गाउँको दूरदराजदेखि काठमाडौंको सिंहदरबारसम्म

काठमाडौं । नबिल बैंक लिमिटेडले चालु आर्थिक वर्षको दोस्रो त्रैमासमा दुई अर्ब भन्दा बढी नाफा कमाएको छ । बैंकले बिहिबार सार्वजनिक गरेको वित्तीय विवरण अनुसार चालु आर्थिक वर्षको दोस्रो त्रैमासमा बैंकले २ अर्ब १ करोड रुपैयाँ खुद नाफा कमाएको हो । बैंकले कमाएको यो नाफा गत आर्थिक वर्षको यसै अवधिको तुलनामा १.२६ प्रतिशतले कम हो। गत आर्थिक वर्षको पुस मशान्तसम्ममा बैंकले २ अर्ब ४ करोड रुपैयाँ खुद नाफा कमाएको थियो।

बैंकले सार्वजनिक गरेको वित्तिय विवरण अनुसार दोस्रो त्रैमासम्ममा बैंकको वितरणयोग्य नाफा १ अर्ब ८४ करोड रुपैयाँ रहेको छ भने बैंकको खुद ब्याज आम्दानी ३ अर्ब ५५ करोड रुपैयाँबाट घटेर ३ अर्ब १२ करोड रुपैयाँमा झरेको छ।

त्यस्तै, बैंकको निक्षेप संकलन १ खर्ब ९० अर्ब रुपैयाँबाट बढेर २ खर्ब रुपैयाँमा पुगेको छ भने कर्जा लगानी १ खर्ब ४८ अर्ब रुपैयाँबाट १ खर्ब ७० अर्ब रुपैयाँ पुगेको छ। बैंकको चुक्ता पूँजी १३ अर्ब ४८ करोड रुपैयाँ रहेको बैंकको जगेडा कोषमा १३ अर्ब ५२ करोड रुपैयाँ रहेको छ।