गाउँको दूरदराजदेखि काठमाडौंको सिंहदरबारसम्म

‘गयौ जहाजमा, फर्कियौ बाकसमा..’ बोलको नेपाली लोक गीतलाई चरितार्थ गर्दै वैदेशिक रोजगारीका लागि खाडी तथा मलेसिया जाने नेपाली श्रमिकको दर्दनाक तथ्यांक उजागर भएको छ ।

युवा श्रमिकमध्ये १५ वर्षको अवधिमा १२ हजारले विदेशमै ज्यान गुमाएका छन् । तीमध्ये एक हजार तीन सय १५ जनाले आत्महत्या गरेको डरलाग्दो तथ्यांक छ । वैदेशिक रोजगार बोर्डले यसबीच खाडी र मलेसियामा ११ हजार ७ सय ६० जना नेपालीको ज्यान गएको तथ्य उजागर गरेको छ । यो तथ्यांकले श्रम गन्तव्य मुलुकमा मृत्यु हुने नेपालीको संख्या बर्सेनि १ हजार देखाउँछ ।

१२.६९ प्रतिशतको सडक दुर्घटना र ६.५९ प्रतिशतको कार्यस्थलमै ज्यान गएको छ । पीडित परिवारले क्षतिपूर्ति पाउनसमेत निकै सास्ती खेप्नुपरेको छ । यसरी मृत्युवरण गरेका १२ हजारमध्ये सडक दुर्घटना र कार्यस्थल दुर्घटनामा परी मृत्यु भएका दुई हजार दुई सय ६९ श्रमिकका परिवारले मात्र क्षतिपूर्ति पाउन सकेका छन् ।

दुर्घटनामा बितेकामध्ये ८१ प्रतिशत परिवारले क्षतिपूर्तिसम्म नपाएको दुःखद अवस्था छ । दुई हजार तीन सय २८ को मृत्यु प्राकृतिक रूपमा भएको छ । दुई हजार पाँच जनाले हृदयाघात र मुटुजन्य रोगबाट मृत्युवरण गरेका छन् । आत्महत्या गर्नेको संख्या एक हजार तीन सय १५ छ । यस्तै दुई सय २३ जनाले कोभिडबाट ज्यान गुमाउनुपरेको छ । मृत्युको ठोस कारण पत्ता नलागेका मात्रै तीन हजार तीन सय २० छन् । खाडी मुलुकमा पुग्नेमध्ये कामको बोझ, चर्को तापक्रम, मुटुजन्य रोग, हृदयाघात मृत्युको कारण बनेको छ ।

(साभार:जनआस्था साप्ताहिकबाट)