गाउँको दूरदराजदेखि काठमाडौंको सिंहदरबारसम्म

काठमाडौं । जेन जी आन्दोलनमा तोडफोड, आगजनीबाट ठूलो क्षति व्यहोरेको एनसेलले फेरि उठ्ने प्रण गरेको छ । आइतबार विज्ञप्ति जारी गर्दै एनसेलले यस्तो प्रतिवद्दता जनाएको हो ।

तोडफोड तथा आगजनीबाट एनसेलको मुख्य कार्यालयमा गम्भीर क्षति पुर्याएकोमा कम्पनीले गहिरो दुःख व्यक्त गरेको छ। कम्पनीले जारी गरेको विज्ञप्तिमा भनिएको छ, “यी घटनाले भौतिक क्षति मात्र नभई कर्मचारीहरूको सुरक्षा र सेवा निरन्तरतामा पनि गम्भीर असर पुर्याएको छ।”

तर चुनौतीबीच पनि एनसेलले आफ्ना ग्राहकलाई दूरसञ्चार सेवा निरन्तर उपलब्ध गराउने प्रतिबद्धता दोहोर्‍याएको छ। कम्पनीका अनुसार सञ्चार सेवा जनजीवनसँग प्रत्यक्ष जोडिएको भएकाले यसको अवरोध न्यून बनाउन सक्दो प्रयास भइरहेको छ।

एनसेलले मोबाइल भ्वाइस, एसएमएस र इन्टरनेट सेवामा निरन्तरता दिन प्राथमिकता दिएको र आफ्नो मूल्य श्रृंखलाभरि आपूर्ति सुनिश्चित गर्न तत्पर रहेको जनाएको छ। यसले कम्पनीको ग्राहकप्रतिको अद्वितीय प्रतिबद्धताको प्रतिविम्ब भएको पनि विज्ञप्तीमा उल्लेख छ।

२० वर्षदेखि नेपालमा सूचना तथा सञ्चार प्रविधि क्षेत्रमा संलग्न एनसेलले रोजगारी सिर्जना, आर्थिक वृद्धिदर वृद्धि र डिजिटल नेपाल निर्माणमा योगदान पुर्‍याउँदै एनसेलले स्मरण गरिएको छ। हाल देखिएका चुनौतीका बाबजुद आफ्नो कर्मचारी, ग्राहक र साझेदारप्रति जिम्मेवारी पूरा गर्ने अटल संकल्पका साथ अघि बढ्ने एनसेलले जनाएको छ ।