साफ च्याम्पियनसिप : नेपाल र बङ्गलादेश बिचकाे खेल आज हुँदै
वि.सं.२०७८ असोज २७ बुधवार
shares
काठमाडौं । साफ च्याम्पियनसिप फुटबलमा आज नेपाल र बङ्गलादेश बिच खेल हुँदैछ ।
मालेमा रहेको राष्ट्रिय रङ्गशालामा नेपाल र बङ्गलादेश बीचको खेल दिउँसो पौने ५ बजे सुरु हुनेछ । नेपालले अहिलेसम्म साफ च्याम्पियनसिपको फाइनल यात्रा तय गर्न सकेको छैन । तर, बङ्गलादेश विरुद्ध बराबरी वा जितको नतिजाले नेपाल पहिलो पटक साफको फाइनलमा पुग्नेछ ।
साफ च्याम्पियनसिपमा नयाँ इतिहास रच्ने सङ्घारमा नेपाली टोली छ । अब नेपाललाई फाइनल पुग्न मात्र एक अङ्कको आवश्यकता छ । नेपालले सुरुआती दुई खेलमा लगातार जित निकालेको थियो । माल्दिभ्सलाई १–० ले हराएको नेपालले श्रीलङ्कालाई ३–२ ले हराएको थियो ।
तर, नेपाल भारतसँग १–० ले पराजित भएको थियो । आज नै भारतले माल्दिभ्स विरुद्ध प्रतिस्पर्धा गर्नेछ ।
नेपाली राष्ट्रिय फुटबल टिमका सहायक प्रशिक्षक किरण श्रेष्ठले फाइनल प्रवेश गर्न बंगलादेशविरुद्ध राम्रो नतिजा निकाल्ने बताएका छन् ।
