गाउँको दूरदराजदेखि काठमाडौंको सिंहदरबारसम्म

चर्चित बिचौलिया तथा विवादास्पद व्यापारी दीपक भट्ट समूहले सेटिङमा हात पारेको एक लघु बीमा कम्पनीमा गृहमन्त्री सुधन गुरुङ पनि सेयर होल्डर रहेको तथ्य भेटिएको छ । सम्पत्ति शुद्धीकरणसम्बन्धी अपराधको अभियोगमा हाल ललितपुरको सानेपास्थित प्रहरी हिरासतमा रहेका भट्ट समूहको लगानी रहेको कम्पनीमा गृहमन्त्री सुधन गुरुङको समेत लगानी देखिएको छ ।

२०७९ सालमा सम्पन्न संघ,प्रदेश र स्थानीय तहको निर्वाचन सकिएलगत्तै भट्टको समूहलाई पोस्ने गरी उनैद्वारा नियुक्त पूर्व गृहसचिव सूर्य सिल्वाल नेतृत्वको नेपाल बीमा प्राधिकरणले सात वटा लघु बीमा कम्पनीलाई लाइसेन्स दिएको थियो । दीपकको दबाबमा शंकर समूह,इन्फिनिटी होल्डिङ, शेखर गोल्छा,भवानी राणा,पशुपति मुरारका,हरि न्यौपाने,किशनलाल दुगड,आरएमसीजस्ता पात्र, राजेश अग्रवाललगायतलाई फाइदा पुग्नेगरी ती कम्पनीहरूले लाइसेन्स पाएका थिए । यसरी लाइसेन्स पाउनेमध्ये एक हो-स्टार माइक्रो इन्स्योरेन्स कम्पनी लिमिटेड ।

सुजन आचार्य अध्यक्ष रहेको यो कम्पनीमा चार जना सञ्चालक छन् । सञ्चालक रहेकी प्रजुनी बज्राचार्य भट्टकै स्वामित्व रहेको इन्फिनिटी होल्डिङकी कर्मचारी हुन् । उनीसमेत सञ्चालक रहेको कम्पनीमा ५७ जना सँस्थापक सेयरधनी छन् । दीपक भट्टसँग विवादास्पद कारोबारमा मुछिएको शंकर समूहको स्वामित्व रहेको जगदम्बा इन्टरप्राइजेजको उक्त कम्पनीमा २५ लाख रुपैयाँ बराबरको सेयर देखिन्छ । त्यति बराबरको रकम अर्थात् २५ लाख रुपैयाँको सेयर हालका गृहमन्त्री सुधन गुरुङको समेत रहेको तथ्य भेटिएको छ,जुन कुरा अघिल्लो हप्ताको सम्पत्ति विवरणमा लुकाइएको छ ।

सेयर लगत किताबको क्रम संख्या ४९ नम्बरमा नाम उल्लेख भएका गुरुङको स्थायी ठेगाना चुमनुब्री वडा नम्बर २,गोरखा राखिएको छ । बाबुको नाम दिलबहादुर गुरुङ भएको उक्त विवरणका सेयरधनी प्रधानमन्त्री कार्यालयले अघिल्लो साता सार्वजनिक गरेको गृहमन्त्री सुधन गुरुङको व्यक्तिगत विवरणसँग पूर्ण मेल खान्छ ।

दीपकका लागि अर्थ मन्त्रालयमा बसेर करको दर हेरफेर गरेको अभियोग लागेका तत्कालीन सुब्बा रघुनाथ घिमिरेकी छोरी रेशा घिमिरेको नाममा पनि एक लाख रुपैयाँ बराबरको सेयर देखिन्छ । सुब्बा घिमिरेविरुद्ध अख्तियार दुरुपयोग अनुसन्धान आयोगले यसअघि दुई करोड १४ लाख रुपैयाँ गैरकानुनी सम्पत्ति आर्जन गरेको भन्दै विशेष अदालतमा मुद्दा दायर गरेको थियो । त्यतिबेला अर्थमन्त्री जनार्दन शर्मा थिए ।

तर,गुरुङले भट्ट र अग्रवाल समूहसँग सम्बन्धित उक्त लघु बीमामा रहेको सेयर रकम आफ्नो सम्पत्ति विवरणमा देखाएनन् । कम्पनी रजिस्ट्रार कार्यालय स्रोतका अनुसार यो कम्पनीमा अधिकांश लगानीकर्ता भट्टकै तर्फबाट विभिन्न कम्पनीमा प्रतिनिधित्व गर्नेहरू छन् । भट्ट मुछिएको विवादास्पद कम्पनी हिमालयन लाइफ इन्स्योरेन्सका तत्कालीन प्रमुख कार्यकारी अधिकृत मनोजकुमार लाल कर्णकी छोरी अदिति कर्णको नाममा पनि दुई लाख रुपैयाँ बराबरको सेयर छ ।

दीपकका लागि अर्थ मन्त्रालयमा बसेर करको दर हेरफेर गरेको अभियोग लागेका तत्कालीन सुब्बा रघुनाथ घिमिरेकी छोरी रेशा घिमिरेको नाममा पनि एक लाख रुपैयाँ बराबरको सेयर देखिन्छ । सुब्बा घिमिरेविरुद्ध अख्तियार दुरुपयोग अनुसन्धान आयोगले यसअघि दुई करोड १४ लाख रुपैयाँ गैरकानुनी सम्पत्ति आर्जन गरेको भन्दै विशेष अदालतमा मुद्दा दायर गरेको थियो । त्यतिबेला अर्थमन्त्री जनार्दन शर्मा थिए ।

सम्पत्ति शुद्धीकरण कसुरमा पक्राउ परेर छुटेका शंकरलाल अग्रवालकी बहिनी रेनु अग्रवालकी कान्छी बुहारी श्रेया रुङ्गटाको नाममा रहेको लोबुचे इन्भेस्टमेन्टको १५ प्रतिशत सेयर स्टार माइक्रो इन्स्योरेन्समा छ ।

स्टारका प्रमुख दुई लगानीकर्तामध्ये घान्द्रुक इन्भेस्टमेन्टको १५ प्रतिशत सेयर स्वामित्व देखिन्छ । २०७९ भदौ ३० मा दर्ता भएको लोबुचे इन्भेस्टमेन्ट श्रेया रुङ्गटाको नाममा छ । उनका पति आयुष गुप्ता जगदम्बा समूहका कार्यकारी निर्देशक रहेको शंकर समूहको आधिकारिक वेबसाइटबाट खुल्छ । घान्द्रुक इन्भेस्टमेन्ट रेनुकै नाममा छ ।

स्टार लघु बीमाको अर्को लगानीकर्ता जगदम्बा इन्टरप्राइजेजमा रेनुसहित रमेश अग्रवाल र अनिल रुङ्गटाको सेयर स्वामित्व छ । वेबसाइटमै हेर्दा पनि जगदम्बा स्टिल उत्पादक कम्पनी जगदम्बा इन्टरप्राइजेजको स्वामित्व शंकर समूहको प्रमाणित हुन्छ ।

त्यस्तै,एउटा नाम चलेको अनलाइनको स्वामित्वमा रहेकाहरुको रेमी क्यापफिन प्रा.लि.को पनि उक्त कम्पनीमा ३२ लाख ५० हजारको तीन लाख २५ हजार कित्ता सेयर रहेको लगतको ५६ नम्बरमा प्रष्टसँग लेखिएको छ । २०७९ भदौ २३ मा दर्ता भएको उक्त कम्पनीले उक्त अनलाइन सञ्चालन गर्दै आएको छ । यसले मिडियामा समेत दीपक भट्टले प्रभाव राखेको अर्थ लगाउन सकिन्छ ।

काठमाडौंबाट प्रकाशित हुने एउटा अंग्रेजी म्यागेजिनमा शंकर समूहकै पारिवारिक सदस्य तथा जगदम्बा समूहकी निर्देशक सुभी अग्रवालको प्रोफाइल केही समय अगाडि निकै महत्वका साथ छापिएको थियो । मिडियाका प्रकाशक मदनप्रसाद लम्सालको नाममा उक्त कम्पनीको ५० हजार कित्ता सेयर प्रदान गरिएको लगतको ५१ नम्बरमा देखिनुले अनेक आशंका उब्जाएको छ ।

दरबारमार्गस्थित नेपाल ट्रस्टको जग्गा हिनामिना प्रकरणमा नेपाल प्रहरीद्वारा फरार सूचीमा राखेर अभियोगपत्र दर्ता गरिएका यती समूहका अध्यक्ष लाक्पा सोनाम शेर्पा पनि सोही  कम्पनीका सेयरधनी हुन् ।

त्यस्तै, २५ करोड रुपैयाँभन्दा बढी राजस्व छलीमा मुछिएर अनुसन्धानमा रहेको भगवती ल्यामिनेट्स प्रा.लि.का सञ्चालक रजनीश करनानीको उक्त कम्पनीमा १० लाख रुपैयाँ बराबरको सेयर देखिन्छ । नेपाल प्रहरीका पूर्व एआईजी हरिबहादुर पालको नाममा पनि एक लाख रुपैयाँको सेयर उल्लेख छ । बिचौलिया भट्टकै नातेदार रामचन्द्र भट्टको पनि सो कम्पनीमा पाँच लाख रुपैयाँ बराबरको सेयर छ । उनीहरुलाई समेत मन्त्री गुरुङसँगको व्यावसायिक साझेदारीसँग जोडिएको छ ।

भ्रष्टाचारको अन्त्य,सुशासन स्थापना तथा सामाजिक सञ्जालमाथि प्रतिबन्ध हटाउनुपर्ने माग राख्दै गत भदौ २३ गते जेन जी पुस्ता शान्तिपूर्ण रूपमा माइतीघरमा उत्रिएको थियो । सोही आन्दोलनमा सहभागी भएका सुधन गुरुङ भदौ २४ गतेको विध्वंशपछि जेन–जीका तर्फबाट नेपाली सेनासँग वार्ताका लागि अग्रसर भएका थिए ।

उनकै पहलमा पूर्वप्रधानन्यायाधीश सुशीला कार्कीको नेतृत्वमा अन्तरिम सरकार बनेको थियो । त्यसपछि थप चर्चामा आएका गुरुङ राष्ट्रिय स्वतन्त्र पार्टीका सभापति रवि लामिछाने र तत्कालीन काठमाडौं महानगरपालिकाका मेयर बालेन शाहलाई मिलाउनमा सक्रिय भए ।

उनकै जोडबलमा पूर्व ऊर्जामन्त्री कुलमान घिसिङलाई समेत वार्ता र सहमतिमा ल्याउन  प्रयास गरियो । तर, घिसिङ रास्वपामा गए पनि पछि आफ्नै पार्टी उज्यालो नेपालमा फर्किए ।

गुरुङ,लामिछाने र शाहबीचको एकतापश्चात रास्वपा फागुन २१ गतेको चुनावमा होमिएको थियो । गुरुङ गोरखा निर्वाचन क्षेत्र नम्बर १ बाट प्रतिनिधि सभा सदस्यमा निर्वाचित भएका छन् ।

बालेन नेतृत्वको वर्तमान सरकारमा उनी गृहमन्त्री छन् । गृहमन्त्री नियुक्त भएलगत्तै ‘स्टन्ट’ शैलीमा उत्रिएका उनले भोलिपल्ट बिहानै जेन–जी आन्दोलनमा दमन गरेको भन्दै पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई पक्राउ गर्न लगाए ।

यता,आर्थिक सुशासनको मागसहित बिचौलिया–नियन्त्रित अर्थतन्त्रको विरोधमा उत्रिएको जेन–जी पुस्ताको प्रतिनिधित्व गर्दै गृहमन्त्री बनेका गुरुङ स्वयमको लगानी बिचौलियाहरुको कम्पनीमा देखिएको छ ।

उनको नेतृत्वको ‘हामी नेपाल’ नामक संस्थामा पनि सबैभन्दा ठूलो दाताको रूपमा शंकर समूह रहेको विवरण यसअघि नै बाहिर आइसकेको छ । सोही समूह र भट्ट समूह जोडिएको कम्पनीमा गुरुङको लगानी देखिएपछि बालेन नेतृत्वको सरकारमाथि नैतिक प्रश्न खडा हुनु अस्वाभाविक होइन ।
अर्कोतर्फ उनै गृहमन्त्री गुरुङले प्रचलित भूमिसम्बन्धी ऐन विपरित देखाएको हदबन्दीभन्दा माथिको जग्गा र सम्पत्ति विवरणबारे प्रश्न उठेपछि सामाजिक सञ्जालमा लेखेर जवाफ दिए । गतसाता उनले लेखेका थिए ‘गरिब भएर जन्मिनु गल्ती होइन,गरिब भएर मर्नु गल्ती हो ।’ जन आस्था साभार