गाउँको दूरदराजदेखि काठमाडौंको सिंहदरबारसम्म

काठमाडौं । आर्थिक वर्ष २०८२/८३ मा सञ्चालनमा रहेका निर्जीवन बीमा कम्पनीहरूको खुद नाफामा उल्लेख्य गिरावट आएको छ। १४ निर्जीवन बीमा कम्पनीले सार्वजनिक गरेको वित्तीय विवरणअनुसार अघिल्लो आर्थिक वर्षको तुलनामा गत आर्थिक वर्षमा यी कम्पनीहरूको समग्र खुद नाफा ३९.२१ प्रतिशतले घटेको हो।

सार्वजनिक वित्तीय विवरणअनुसार आर्थिक वर्ष २०८२/८३ मा १४ कम्पनीले कुल २ अर्ब ७९ करोड १५ लाख रुपैयाँ खुद नाफा कमाएका छन्। अघिल्लो आर्थिक वर्षमा यी कम्पनीहरूको कुल खुद नाफा ४ अर्ब ५९ करोड २२ लाख रुपैयाँ रहेको थियो। यसअनुसार एक वर्षको अवधिमा निर्जीवन बीमा कम्पनीहरूको कुल खुद नाफा १ अर्ब ८० करोड रुपैयाँभन्दा बढीले घटेको देखिन्छ।

ओरियन्टलको उल्लेख्य सुधार

नाफाका आधारमा ओरियन्टल इन्स्योरेन्स सबैभन्दा अगाडि देखिएको छ। अघिल्लो आर्थिक वर्ष ११ करोड ७६ लाख रुपैयाँ घाटामा रहेको कम्पनीले गत आर्थिक वर्षमा उल्लेख्य सुधार गर्दै ४९ करोड ४ लाख रुपैयाँ खुद नाफा आर्जन गरेको छ।

यससँगै ओरियन्टल १४ निर्जीवन बीमा कम्पनीमध्ये सबैभन्दा धेरै खुद नाफा कमाउने कम्पनी बनेको छ। घाटाबाट नाफामा फर्किनु कम्पनीका लागि उल्लेख्य सुधारका रूपमा देखिएको छ।

यता नेसनल इन्स्योरेन्स भने अझै घाटामा रहेको छ। अघिल्लो आर्थिक वर्ष १५ करोड ७ लाख रुपैयाँ घाटामा रहेको कम्पनीले गत आर्थिक वर्षमा १३ करोड १० लाख रुपैयाँ नोक्सानी व्यहोरेको छ। १४ कम्पनीमध्ये घाटामा रहने नेसनल इन्स्योरेन्स एक्लो कम्पनी हो।

प्रभु इन्स्योरेन्सको नाफा बढ्यो

समीक्षा अवधिमा प्रभु इन्स्योरेन्स बाहेक नाफामा रहेका अधिकांश कम्पनीको खुद नाफा घटेको छ। प्रभु इन्स्योरेन्सले भने अघिल्लो आर्थिक वर्षको तुलनामा नाफा १९.७१ प्रतिशतले वृद्धि गरेको छ।

अघिल्लो आर्थिक वर्षमा २० करोड ५८ लाख रुपैयाँ खुद नाफा कमाएको प्रभुले गत आर्थिक वर्षमा नाफा बढाएर २४ करोड ६४ लाख रुपैयाँ पुर्‍याएको छ।

सलिको दोस्रो, राष्ट्रिय बीमा कम्पनी तेस्रो

नाफाका आधारमा ओरियन्टलपछि सगरमाथा लुम्बिनी इन्स्योरेन्स (सलिको) दोस्रो स्थानमा रहेको छ। कम्पनीले ३७ करोड ५६ लाख रुपैयाँ खुद नाफा कमाएको छ। यद्यपि, कम्पनीको नाफा अघिल्लो आर्थिक वर्षको तुलनामा ३२.७५ प्रतिशतले घटेको हो।

त्यस्तै राष्ट्रिय बीमा कम्पनीले ३४ करोड ४४ लाख रुपैयाँ खुद नाफा कमाएको छ। कम्पनीको नाफा अघिल्लो वर्षको तुलनामा १९.४६ प्रतिशतले घटेको छ।

हिमालयन एभरेस्ट इन्स्योरेन्सले ३३ करोड ७८ लाख रुपैयाँ, सिद्धार्थ प्रिमियर इन्स्योरेन्सले ३२ करोड ६८ लाख रुपैयाँ र नेको इन्स्योरेन्सले २८ करोड ८३ लाख रुपैयाँ खुद नाफा कमाएका छन्।

यी तीन कम्पनीको नाफा क्रमशः ३६.५३ प्रतिशत, ५६.७५ प्रतिशत र ५०.१९ प्रतिशतले घटेको छ।

आइजिआई प्रुडेन्सियलको नाफामा सबैभन्दा ठूलो गिरावट

प्रतिशतका आधारमा सबैभन्दा ठूलो गिरावट आइजिआई प्रुडेन्सियल इन्स्योरेन्सको खुद नाफामा देखिएको छ।

अघिल्लो आर्थिक वर्षमा ३६ करोड ४९ लाख रुपैयाँ खुद नाफा कमाएको कम्पनीको नाफा ९८.८९ प्रतिशतले घटेर गत आर्थिक वर्षमा ४० लाख ३८ हजार रुपैयाँमा सीमित भएको छ।

त्यस्तै, शिखर इन्स्योरेन्सको खुद नाफा ७१.२२ प्रतिशतले घटेर १३ करोड रुपैयाँमा सीमित भएको छ भने सानिमा जीआईसी इन्स्योरेन्सको नाफा ६१.३९ प्रतिशतले घटेर १३ करोड रुपैयाँमा झरेको छ।

नेपाल इन्स्योरेन्सको खुद नाफा ५९.६९ प्रतिशतले घटेर १२ करोड ७५ लाख रुपैयाँमा सीमित भएको छ। त्यसैगरी युनाइटेड अजोड इन्स्योरेन्सको नाफा ६४.५५ प्रतिशतले घटेर ६ करोड ३० लाख रुपैयाँ तथा एनएलजी इन्स्योरेन्सको नाफा ६२.३१ प्रतिशतले घटेर ५ करोड ७८ लाख रुपैयाँमा सीमित भएको छ।

अधिकांश कम्पनी दबाबमा

१४ निर्जीवन बीमा कम्पनीको वित्तीय विवरणले समीक्षा अवधिमा अधिकांश कम्पनीको नाफामा दबाब परेको देखाएको छ। ओरियन्टल र प्रभु इन्स्योरेन्सले नाफामा सुधार गरे पनि बाँकी अधिकांश नाफामा रहेका कम्पनीको खुद नाफा अघिल्लो वर्षको तुलनामा घटेको छ।

विशेषगरी आइजिआई प्रुडेन्सियल, शिखर, सानिमा जीआईसी, युनाइटेड अजोड र एनएलजी इन्स्योरेन्सको नाफामा उच्च दरको गिरावट आएको छ। यसले निर्जीवन बीमा व्यवसायमा कम्पनीगत रूपमा वित्तीय प्रदर्शन असमान रहेको देखाउँछ।

समग्रमा, आर्थिक वर्ष २०८२/८३ मा १४ निर्जीवन बीमा कम्पनीको कुल खुद नाफा अघिल्लो वर्षको ४ अर्ब ५९ करोड २२ लाख रुपैयाँबाट घटेर २ अर्ब ७९ करोड १५ लाख रुपैयाँमा झरेको छ। नाफामा आएको करिब ४० प्रतिशतको गिरावटले निर्जीवन बीमा क्षेत्रको वित्तीय प्रदर्शनमा उल्लेख्य दबाब देखिएको छ। यद्यपि, घाटाबाट नाफामा फर्किएको ओरियन्टल र नाफा वृद्धि गर्न सफल प्रभु इन्स्योरेन्सको प्रदर्शन भने तुलनात्मक रूपमा सकारात्मक देखिएको छ।