गाउँको दूरदराजदेखि काठमाडौंको सिंहदरबारसम्म

काठमाडौं,  राजनीतिक रुपमा विभाजित सत्तारुढ नेकपाको प्रचण्डमाधव समूहका अध्यक्ष पूर्वप्रधानमन्त्री माधव कुमार नेपालले प्रधानमन्त्री केपी शर्मा ओली र प्रवृत्तिको आयु पुगेको बताएका छन् ।

आफ्नो समूहको विरोध सभालाई काठमाडौंको भृकुटीमण्डपमा सम्बोधन गर्दै नेता नेपालले ओलीले गणतन्त्रको आन्दोलनको समयमा बयलगाढा चढेर अमेरिका नपुगिने भन्दै आन्दोलनको मजाक उडाएको भन्दै ओली र प्रवृत्तिको आयु पुगेको बताएका छन ।

ओली सरकार जनताको विरुद्धमा, जनचाहनाविरोधी कदम चालेकाले जनता सडकमा उत्रिएको नेता नेपालले बताएका छन । सबै विपक्षी राजनीतिक दल सडकमा उत्रिएकाले आफूहरुको पक्षमा सबै जनता रहेको बताएका छन ।

ओलीका कारण जनतालाई सुख कम, दुःख ज्यादा पाएको, मान कम, अपमान ज्यादा सहेको बताएका छन । ओलीले म्यानुपुलेसनमा विश्वास गर्ने गरेको र एकै दिन धेरै कार्ड खेल्ने गरेको बताएका छन ।

उनले त्यसलाई यसरी ब्याख्या गरे –

कमरेड बामदेवलाई बिहान ११ बजे बोलाएर भन्नुहुन्छ, म आजै छोड्न चाहन्छु, तपाई प्रम हुनुपर्‍यो । उपचुनाव गरेर भएपनि ल्याउन आतुर छु । राष्ट्रिय सभाबाट आउने भएपनि संविधान संशोधन गरेर प्रधानमन्त्री बनाउन तयार छु । पार्टीको महाधिवेशन गरेर एकल अध्यक्ष बनाउन पनि आतुर छु ।

१२ बजे मलाई बोलाएर भन्नुहुन्छ, अरु कोही काबिल भएनन् माधव कमरेड । तपाई नै प्रधानमन्त्री हुनुपर्‍यो, पार्टीको एकल अध्यक्ष हुनुपर्‍यो । अनि, ४ बजे कमरेड प्रचण्डलाई बोलाएर भन्नुहुन्छ, कोही गतिला मान्छे पाइनँ मैले । तपाईभन्दा गतिलो कोही छैन । तपाई एकल अध्यक्ष हुनुपर्छ, प्रधानमन्त्री पनि बन्नुपर्छ ।

जब तीन जना हामी भेला हुन्छौं, जम्मै भण्डाफोर हुन्छ । ठीक यही प्रवृत्ति थियो तत्कालीन राजा ज्ञानेन्द्रमा । मलाई बेलाएर भन्नुहुन्थ्यो, गिरिजाप्रसाद विदेशी दलाल हो, यसले त देश नै खाने भयो । नेपाली कांग्रेस काम नै लाग्दैन । कम्युनिस्टमा देशभक्ति हुन्छ, माधवजी, तपाईले भुमिका खेल्नुपर्छ ।

म त्यहाँ हिँडेपछि गिरिजाबाबुलाई बोलाएर भन्नुहुन्थ्यो, कम्युनिस्टहरु तानाशाहहरु हुन् । नेपालमा यसको नामेट गर्नुपर्छ । माधव नेपाल जस्ताले केही गर्न सक्छ रु गिरिजाबाबु तपाईँ त महान मान्छे ।

जब हामीले दुबैले के कुरा भयो हँ भनेर सोध्यौं । पोल खोलाखोल भयो । हामीले सल्लाह गर्यौँ, अब भेट हुँदा एकले अर्कालाई जानकारी गराउने । पोल खुलेपछि संयुक्त रुपमा जान थाल्यौं । संयुक्त रुपमा गएर पनि पार लागेन, जान छोडिदियौं । सडकको बाटो सामात्यौं, आन्दोलनको आँधीबेहरी सृष्टि गर्‍यौं र त्यसपछि राजतन्त्रको अन्त्य भयो । बडो लाजमोर्दो कुरा हो, पार्टीभित्र पनि यस्ता तत्व जन्मिँदो रहेछ ।