गाउँको दूरदराजदेखि काठमाडौंको सिंहदरबारसम्म

त्रिदेशीय कप फुटबल अन्तर्गत नेपाल र बंगलादेशबीचकाे खेल आज हुँदैछ ।

तिन देश नेपाल बंगलादेश र किर्गिस्तान यू-२३ टिम सम्मिलित प्रतियोगितामा बंगलादेश यसअघि नै फाइनल पुगिसकेको छ।

नेपालले भने फाइनलकाे यात्रा तय गर्नकाे लागि बंगलादेशसंग बराबरी खेले पर्याप्त हुनेछ । बंगलादेशले पहिलो खेलमा किर्गिस्तानलाई १-० ले पराजित गरेको थियो । नेपालले किर्गिस्तानसँग गोलरहित बराबरी खेलेपछि बंगलादेश एक खेलअघि फाइनल पुगेको हो।

नेपाल र बंगलादेशबीचको खेलपछि नै फाइनल समीकरण तय हुनेछ । नेपालले सोमबार हुने फाइनलमा स्थान बनाउन कम्तीमा हार टार्नु पर्नेछ ।

पहिलो खेलमा किगिर्स्तानसँग बराबरीमा रोकिएपछि नेपालमा मुख्य प्रशिक्षक बालगोपाल महर्जनले बंगलादेशविरुद्ध अंक जोड्दै फाइनल पुग्ने लक्ष्य रहेको बताएका थिए ।

नेपालकाे सम्पुर्ण पक्ष सुधार्दै बंगलादेशविरुद्ध मैदानमा उत्रिने समेत महर्जनले बताए । नेपाललाई भने बदला लिने राम्रो अवसर पनि रहेकाे छ।

गत नोभेम्बरमा नेपालले बंगलादेशसँग उसैको मैदानमा दुई खेलको मैत्रीपूर्ण सिरिज खेलेको थियो । जसमा नेपाल पहिलो खेलमा २-० ले पराजित भएको थियो ,भने दोस्रो खेल गोलरहित बराबरीमा सकिएको थियो ।

बंगलादेशले पहिलो खेलमा किर्गिस्तानलाई हराइकसको र फाइनलमा पनि स्थान पक्का गरिसकेकोले मनोबल उच्च छ । किर्गिस्तानलाई हराएपछि बंगलादेशका प्रशिक्षक जेम्स डे ले नेपालको पहिलो खेल हेरेर त्यस अनुसार रणनीति बनाएर खेल्ने बताएका थिए । फाइनलमा स्थान पक्का गरिसकेकोले बंगलादेशलाई नेपालसंग खेल्दा कुनै दबाब हुने छैन ।

उता किर्गिस्तानको पनि फाइनल पुग्ने सम्भावना अझै सकिएको छैन । किर्गिस्तान नेपाल र बंगलादेशको खेलको नतिजाको पर्खाइमा छ । किर्गिस्तानका प्रशिक्षक झोल्डोसोभ नुर्बेकले नेपाल र बंगलादेशबीचको खेलमा न्यायपूर्ण नतिजा आउने आशा राखेका छन् ।

बंगलादेश र नेपालबीच अहिलेसम्म २१ खेल भएको छ । जसमा बंगलादेश १३ खेलमा विजयी हुँदा नेपालले ६ खेल जितेको छ ।२ खेल भने बराबरीमा सकिएको थियो ।