धवलागिरि हिमाल आरोही श्रेष्ठ आजै साँझ आधार शिविर आइपुग्ने

  • प्रकाशित मिति : २०७८ आश्विन १६, शनिबार ०६:४३
  • सिंहदरबार न्युज

काठमाडौं । विश्वको सातौं अग्लो धवलागिरि हिमालमा पहिलोपटक दुई नेपाली महिलाले सफल आरोहण गरेका छन् । म्याग्दीको धवलागिरि गाउँपालिका–४ मा पर्ने ८ हजार १ सय ६७ उचाइको हिमाल पूर्णिमा श्रेष्ठ र पासाङल्हामु शेर्पाले शुक्रबार बिहान ५ बजे आरोहण गरेको आरोहणको व्यवस्थापन गरेको सेभेन समिट टे«क्सका अध्यक्ष मिङमा शेर्पाले जानकारी दिए । उक्त कम्पनीबाट आजै अन्य २० जनाले धवलागिरि आरोहण गरेका थिए । यसअघि नेपाली महिलाले धवलागिरिको आरोहण गरेको रेकर्ड छैन ।

आरोही श्रेष्ठ फोटो पत्रकार र शेर्पा आरोहणमा आबद्ध व्यक्ति हुन् । शरद ऋतुको आरोहणका लागि उक्त कम्पनीमार्फत श्रेष्ठ यही असोज २ गते मुस्ताङको मार्फा हुँदै पैदलमार्ग भएर धवलागिरि आरोहणमा गएको थियो । गोरखा आरुघाट निवासी उनको टोलीले यसअघि गत वैशाख ३ मा म्याग्दीको अन्नपूर्ण गाउँपालिका–४ नारच्याङस्थित ८ हजार ८१ मिटर अग्लो अन्नपूर्ण प्रथम हिमाल आरोहण गरेर कीर्तिमान बनाएको थियो । कारोबार आर्थिक दैनिकमा कार्यरत श्रेष्ठले यसअघि सन् २०१८ मा सगरमाथा, २०१७ मा मनासलु र २०१९ मा अमादब्लम हिमाल पनि आरोहण गरेको थियो ।

पर्यटन विभागको पर्वतारोहण शाखाका अनुसार यस याममा हिमाल आरोहणका लागि २५ आरोही समूहका २ सय ३० आरोहीले आरोहण अनुमति लिएकामा धवलागिरि आरोहणका लागि चार आरोही समूहका १२ महिला र २८ पुरुष गरी कुल ४० आरोहीले आरोहण अनुमति लिएका थिए । यस याममा सबैभन्दा बढी मनासलु हिमाल आरोहणका लागि १७ आरोही समूहका १ सय ७१ आरोही छन् । मनास्लु आरोहणमा ३८ महिला र १ सय ३३ पुरुषले अनुमति लिएका थिए ।

धवलागिरि गाउँपालिका र रघुगंगा गाउँपालिकाको सिमाना तथा छिमेकी जिल्ला मुस्ताङबाट समेत धवलागिरि हिमालमा जान सकिने भए पनि नियमित आरोहणका लागि पश्चिम मोहडा नै आरोहीको रोजाइमा पर्ने गरेको छ ।

सन् १९६० मे महिनाको १३ तारिखमा अस्ट्रेलियन नागरिक कुर्ड डिम्बकरणले पहिलोपटक धवलागिरि आरोहण गरेको रेकर्ड छ तर विभिन्न अभिलेखमा सन् १९४९ मा भारतमा रहेको ब्रिटिसको टोलीले सर्वेक्षण गरेको भए पनि १९४९ को स्विस हवाई सर्वेक्षण अज्ञात थियो । केही समयअगाडि विश्व कीर्तिमानी बनाउने क्रममा म्याग्दीका निर्मल पुर्जाले अक्सिजनबिना नै आरोहण गरेपछि धवलागिरि हिमालको चर्चा भएको थियो । याे समाचार राजधानी दैनिकमा छ।