गाउँको दूरदराजदेखि काठमाडौंको सिंहदरबारसम्म

काठमाडौं । नबिल बैंकको प्राविधिक प्रणालीमा आवश्यक सुधार तथा अपग्रेडको कार्य सम्पन्न भएसँगै बैंकका सम्पूर्ण बैंकिङ सेवाहरू पुनः नियमित रूपमा सञ्चालनमा आएका छन्।

बैंकले सूचना जारी गर्दै प्राविधिक सुधारपछि रोकिएका तथा प्रभावित भएका सबै सेवाहरू पूर्ववत् रूपमा सञ्चालनमा आएको जानकारी दिएको हो।

बैंकका अनुसार प्रविधिगत सुरक्षा संवेदनशीलतालाई ध्यानमा राख्दै सम्भावित जोखिमको मूल्याङ्कन तथा आवश्यक प्राविधिक सुधारका कार्यहरू गरिएको थियो। प्रणालीको सुरक्षा र सेवा सञ्चालनलाई थप प्रभावकारी बनाउने उद्देश्यले गरिएको उक्त सुधार कार्य सम्पन्न भएपछि बैंकिङ सेवाहरू नियमित अवस्थामा फर्किएका हुन्।

यसअघि बैंकले प्राविधिक प्रणालीमा देखिएको सुरक्षा संवेदनशीलताका कारण केही डिजिटल तथा अन्य बैंकिङ सेवाहरू अस्थायी रूपमा बन्द गरेको थियो। बन्द गरिएका सेवाहरूमा एनबैंक माइक्रोसाइट, जेनअल्फा एपमार्फत डेबिट कार्ड अनुरोध, क्रेडिट कार्ड अनुरोध तथा मुद्दती खाता धितोमा ऋण लिने प्रणालीलगायत रहेका थिए।

ती सेवाहरू बन्द हुँदा ग्राहकहरूलाई डिजिटल माध्यमबाट उपलब्ध हुने केही बैंकिङ सुविधामा असर परेको थियो। बैंकले आवश्यक प्राविधिक सुधार तथा अपग्रेडको काम पूरा गरेसँगै प्रभावित सेवाहरू पुनः सञ्चालनमा ल्याएको जनाएको छ।

बैंकिङ प्रणालीमा प्राविधिक सुरक्षा र सेवाको निरन्तरता महत्वपूर्ण हुने भएकाले जोखिम पहिचान तथा आवश्यक सुधारका कार्यलाई प्राथमिकतामा राखिएको बैंकको सूचनाबाट बुझिन्छ।