गाउँको दूरदराजदेखि काठमाडौंको सिंहदरबारसम्म

काठमाडौं । बंगालको खाडीमा विकसित शक्तिशाली चक्रवात ‘अर्नब’को प्रभावले भारतको आन्ध्र प्रदेशका तटीय क्षेत्रमा तीव्र हावाहुरी, भारी वर्षा र समुद्रमा ठूला छाल उठेका छन् । भारतीय मौसम विभागका अनुसार चक्रवातको तटीय क्षेत्रमा प्रवेश गर्ने प्रक्रिया बुधबार बिहानसम्म जारी थियो ।

मौसम विभागले चक्रवातको पछिल्लो भाग आगामी एक घण्टाभित्र तटीय क्षेत्रमा प्रवेश गरी जमिनमा पुग्ने प्रक्रिया पूरा हुने जनाएको छ । चक्रवातको केन्द्र यानमको दक्षिणतर्फ आन्ध्र प्रदेश र यानमको तटीय क्षेत्रमा रहेको विभागले जनाएको छ ।

आन्ध्र प्रदेशको अमरावती मौसम विभागकी निर्देशक डा. के. नागरत्नाका अनुसार चक्रवात मंगलबार राति बापट्ला र यानमबीचको तटीय क्षेत्रमा प्रवेश गरेको थियो । बुधबार बिहान तटीय क्षेत्रमा प्रतिघण्टा १२५ देखि १३५ किलोमिटरको गतिमा हावा चलिरहेको र आगामी तीन घण्टामा हावाको झोक्का प्रतिघण्टा १५० किलोमिटरसम्म पुग्न सक्ने उनले बताइन् ।

चक्रवातको गति सुस्त भएकाले यसको प्रभाव तटीय क्षेत्रमा लामो समयसम्म रहन सक्ने मौसम विभागको अनुमान छ । काकिनाडा र यानमको तटीय क्षेत्रमा समुद्र अत्यधिक अशान्त बनेको छ । सामान्य अवस्थाभन्दा २.५ मिटरसम्म अग्ला छाल उठिरहेको विभागले जनाएको छ । समुद्रमा पानीको सतह बढेर काकिनाडा र यानमका होचा भूभागमा पस्न सक्ने जोखिम रहेकाले स्थानीय बासिन्दालाई सतर्क रहन आग्रह गरिएको छ ।

चक्रवातको प्रभावले आन्ध्र प्रदेशका बापट्ला, गुंटुर, कृष्णा, एनटीआर, एलुरु, पश्चिम गोदावरी, कोनसीमा, पूर्वी गोदावरी, काकिनाडा, अल्लुरी, अनकापल्ली, विशाखापट्टनम, विजयनगरम, श्रीकाकुलम र पार्वतीपुरम मान्यम गरी १५ जिल्लामा आकस्मिक बाढीको चेतावनी जारी गरिएको छ ।

ती जिल्लाका विभिन्न क्षेत्रमा जुनसुकै बेला आकस्मिक बाढी आउन सक्ने मौसम विभागले जनाएको छ । चक्रवातको जमिनमा प्रवेश गर्ने प्रक्रिया पूरा नभएसम्म र तीव्र हावाहुरी कम नभएसम्म घरभित्रै बस्न विभागकी निर्देशक नागरत्नाले आग्रह गरेकी छन् । उनले विद्युत्का खम्बा, पुराना भवन र ठूला रूखमुनि नबस्न तथा आधिकारिक सूचनाको निगरानी गर्न पनि आग्रह गरेकी छन् ।

विशाखापट्टनमको आरके समुद्री तटमा तीव्र हावाहुरी र अग्ला छाल देखिएपछि प्रहरीले सर्वसाधारणको प्रवेशमा रोक लगाएको छ । माछा मार्न समुद्रमा नजान माछा मार्ने समुदायलाई पनि सचेत गराइएको छ । तीव्र हावाका कारण विशाखापट्टनमस्थित आन्ध्र विश्वविद्यालयको महिला इन्जिनियरिङ कलेज नजिकै एउटा रूख ढलेको छ ।

विजयवाडा सहर र आसपासका क्षेत्रमा चट्याङसहित भारी वर्षा र तीव्र हावाहुरी चलेको छ । वर्षाका कारण होचा बस्ती तथा मुख्य सडकहरूमा पानी जमेको छ । बुधबार दिनभर मध्यमदेखि भारी वर्षा जारी रहन सक्ने अधिकारीहरूले बताएका छन् ।

आन्ध्र प्रदेशका मुख्यमन्त्री एन. चन्द्रबाबु नायडूले राज्य सरकारले चक्रवातको अवस्थालाई नजिकबाट निगरानी गरिरहेको बताएका छन् । मंगलबार उनले २ हजार १९९ वटा चक्रवात आश्रयस्थल पहिचान गरिएको र सम्भावित जोखिममा रहेका बासिन्दालाई सुरक्षित स्थानमा सार्ने योजना तयार रहेको जानकारी दिएका थिए ।

१४ जिल्लामा राष्ट्रिय विपद् प्रतिकार्य बल (एनडीआरएफ) का १२ र राज्य विपद् प्रतिकार्य बल (एसडीआरएफ) का १० टोली परिचालन गरिएको छ । सरकारले १ हजार ८७ वटा स्वास्थ्य टोली, ८ हजार २८१ आकस्मिक शय्या र १ हजार २७४ एम्बुलेन्स तयारी अवस्थामा राखेको जनाएको छ ।

सावधानीस्वरूप गर्भवती महिलालाई अस्पतालमा सारिएको छ । खानेपानीका ट्यांकर, जेनेरेटर, पानी प्रशोधन उपकरण तथा ढलेका रूख हटाएर सडक सम्पर्क पुनःस्थापना गर्ने सामग्रीसमेत तयारी अवस्थामा राखिएको छ । राज्यको आरटीजीएस केन्द्र र आन्ध्र प्रदेश विपद् व्यवस्थापन प्राधिकरणले चौबीसै घण्टा अवस्थाको निगरानी गरिरहेका छन् ।

चक्रवातका कारण हवाई सेवा पनि प्रभावित भएको छ । विशाखापट्टनम विमानस्थलमा अक्टोबर २७ को दिउँसोदेखि उडान सेवा स्थगित गरिएको थियो । विजयवाडा र राजमहेंद्रवरम विमानस्थलमा मंगलबार साँझ ७ बजेपछि सेवा रोकिएको थियो । एयर इन्डिया, एयर इन्डिया एक्सप्रेस, इन्डिगो र अकासा एयरले उडान रद्द गरेको जानकारी दिएका छन् । एलायन्स एयरले भने आफ्नो सेवा सामान्य रहेको जनाएको छ ।

भारतको नागरिक उड्डयन मन्त्रालयले यात्रुलाई विमानस्थल जानुअघि उडानको अवस्था जाँच गर्न र प्रभावित यात्रुलाई आवश्यक सहयोग उपलब्ध गराउन सम्बन्धित वायुसेवा कम्पनीहरूलाई आग्रह गरेको छ । एएनआई