गाउँको दूरदराजदेखि काठमाडौंको सिंहदरबारसम्म

काठमाडौँ ।१९८१५४ कर्मचारी सङ्केत नम्बर भएका नेपाल सरकारका उपसचिव छविलाल नेपालीको प्रशासनिक यात्रा हेर्दा अचम्म लाग्ने अवस्था देखिन्छ । अघिल्लो सरकारले उनलाई बर्दियाको ठाकुरद्वारा नगरपालिका सरुवा गरे पनि उनी त्यहाँ गएनन् । बरु, उपत्यकाको मालदार कार्यालयमा मस्ती मार्ने योजना अनुसार कर्मचारी सङ्गठनका नेतासँग सिफारिस मिलाउँदै भूमि व्यवस्था, सहकारी तथा गरिबी निवारण मन्त्रालय गएका छन्।

२०७८ असोज ७ गते मन्त्रालयमा पुगेपछि उनको आर्थिक हैसियत एकाएक बढेको देखिन्छ । पारिवारिक नाममा काठमाडौँमा भएका सम्पत्तिहरूले पनि यही सङ्केत गर्छन् । सोही वर्ष असोज १४ गते उनी बाँके मालपोत कार्यालयमा खटिए । त्यसपछि २०८० भदौमा टोखा मालपोत कार्यालय पुगे । यद्यपि टोखा ‘अतिरिक्त आम्दानी हुने’ कार्यालय नभएकाले तीन महिनामै उनी डिल्लीबजार मालपोत कार्यालयको प्रमुख बने । जानकारहरूका अनुसार डिल्ली बजार मालपोत जान ठुलै नगदको आवश्यकता पर्दछ ।

डिल्लीबजारमा रहँदा उनले तत्कालीन राजपरिवारसँग जोडिएको काठमाडौँको विवादित जग्गा सम्बन्धी निर्णय गरेपछि उनको आर्थिक उचाइले आकाश छोयो । एक जना सहकर्मीका अनुसार, त्यस कार्यालयबाट निस्कँदा उनको जीवनशैली एकाएक परिवर्तन भएको थियो ।

तर, विवादित फाइलकै कारण एक वर्ष नपुग्दै उनलाई कमलबजार नगरपालिका, अछाम सरुवा गरिएको थियो । यो सरुवा ‘अनौपचारिक कारबाही’ सरह थियो । तर, उनी अछाम गएनन् । बरु, पहुँच र बिचौलिया सञ्जालको भरमा पुनः भूमि मन्त्रालयमै फर्किए ।

उनी कास्की मालपोत गएर कास्कीको लिची वारी विवाद मिलाउने योजनामा भूमि व्यवस्था मन्त्रालय पुगेका हुन् । बिचौलियासँगको साँठगाँठमा उनले २०८२ भदौ २ गते कास्की मालपोत प्रमुखको जिम्मेवारी पाए । तर, त्यहाँ योजना मुताबिक काम गर्न सकेनन् । विवाद बढेपछि उनलाई तत्कालीन मन्त्रीले बर्दियाको एक नगरपालिकामा सरुवा गरिदिए ।

तर, उनी त्यहाँ पनि गएनन् । बिचौलिया र कर्मचारी सङ्गठनका नेता प्रयोग गरेर फेरि मालपोतमा मस्ती मार्ने योजना बनाई रहे ।र, अहिले भूमि मन्त्रालय पुगेका छन् ।  प्रायः सिंहदरबारमा भेटिने उनले कर्मचारी सङ्गठनका माथिल्लो तहका एक नेतालाई खर्चपर्चको व्यवस्था गरेका थिए ।

०६८ साल भदौमा निजामती सेवामा प्रवेश गरेका नेपालीको करिब १५ वर्षे सेवा कालमा उनले आर्जन गरेको सम्पत्ति र जीवनशैली हेर्दा जो कोही अचम्ममा पर्छ । राजधानीमा आरामदायी र बिलासी जीवन बिताइरहेका उनी अहिले पनि आफूलाई खटाइएको ठाउँको सरुवा बदर गराएर फेरि उपत्यकाको कुनै ‘मालदार मालपोत’मा फर्कने प्रयत्नमा छन् ।